മേപ്പാടി: ശമ്പള കുടിശ്ശിക വിതരണം മുടങ്ങിയതോടെ തോട്ടം തൊഴിലാളികള്‍ സമരത്തിനൊരുങ്ങുന്നു. കൂലി വര്‍ധനവിന് നല്‍കിയ മുന്‍ കാല പ്രാബല്യം പ്രഖ്യാപിച്ചിരുന്നു. ഇതിലെ നാല് മാസത്തെ കുടിശ്ശികയാണ് വിതരണംചെയ്യാനുള്ളത്. കുടിശ്ശിക വിതരണം പൂര്‍ത്തിയായതോടെ അവസാന തിയതി ഇന്ന് അവസാനിക്കും. പോഡാര്‍ പ്ലാന്റേഷന്‍, ഹാരിസണ്‍സ് മലയാളം, ചെമ്പ്ര ഫാത്തിമാഫാം എന്നീ തോട്ടങ്ങളില്‍ കുടിശ്ശിക വിതരണം ഇന്ന് ഉണ്ടാവില്ലന്ന് അറിയിച്ചിട്ടുണ്ട്.
ഈ തോട്ടങ്ങളിലെ തൊഴിലാളികളാണ് പ്രക്ഷോഭത്തിന് തയാറെടുക്കുന്നത്. പോഡാര്‍ പ്ലാന്റേഷനില്‍ സംയുക്ത സമര സമിതിയാണ് സമരം നടത്തുക. നാളെ നടക്കുന്ന സമര സമിതി യോഗത്തില്‍ സമരത്തിന്റെ രൂപം തീരുമാനിക്കുകയും ഹാരിസണ്‍സ് മലയാളം കമ്പനിയിലെ തൊഴിലാളികളും തിങ്കളാഴ്ചക്ക് ശേഷം സമരം പ്രഖ്യാപിച്ചേക്കും.
69 രൂപ വര്‍ധിപ്പിച്ച 301 രൂപയായാണ് സര്‍ക്കാര്‍ വിജ്ഞാപനം ഇറക്കിയിരുന്നത്. ആറ് മാസത്തെ മുന്‍ കാല പ്രാബല്യമായിരുന്നു പ്രഖ്യാപിച്ചിരുന്നത്. രണ്ട് മാസത്തെ കുടിശ്ശിക വിതരണം ചെയ്തു. ബാക്കി നാല് മാസത്തെ കുടിശ്ശിക ഇന്നാണ് നല്‍കേണ്ടത്. സമ്പത്തിക പ്രതിസന്ധി ചൂട്ടികാട്ടിയാണ് കുടിശ്ശിക വിതരണം വൈകുന്നത്.
സംസ്ഥാന വ്യാപകമായി നടന്ന സമരത്തെ തുടര്‍ന്നാണ് തോട്ടം തൊഴിലാളികളുടെ വേതനം വര്‍ധിപ്പിച്ചിരുന്നത്. എന്നാല്‍ അന്ന് സര്‍ക്കാരും മാനേജ്‌മെന്റുകളും തൊഴിലാളി സംഘടകളുമായി നടന്ന ചര്‍ച്ചയില്‍ ധാരണയായിരുന്ന കോര്‍ട്ടേഴ്‌സുകളുടെ അറ്റകുറ്റപ്പണി, ചികിത്സാ സൗകര്യം തുടങ്ങിയ നിരവധി ആവശ്യങ്ങള്‍ ഇതുവരെ അധികൃതര്‍ പരിഗണിച്ചിട്ടില്ല.
കൂടാതെ സമരത്തിന് ശേഷം പല എസ്റ്റേറ്റ് മാനേജ്‌മെന്റുകളും തൊഴില്‍ നിഷേധമടക്കമുള്ള തൊഴിലാളി വിരുദ്ധ നിലപാടുകാളാണ് സ്വീകരിച്ചു വരുന്നത്. ഇതിനെതിരേ തൊഴിലാളി സംഘടനകളുടെ ഭാഗത്ത് നിന്ന് കാര്യമായ പ്രതിഷേധങ്ങള്‍ ഇതുവരെ ഉയര്‍ന്നിട്ടില്ല. തൊഴിലാളി സംഘടനകളുടെ ഈ നിലപാടിലും തൊഴിലാളികള്‍ അതൃപ്തരാണ്.