ന്യൂഡല്‍ഹി: കേന്ദ്രസര്‍ക്കാര്‍ ആരോപണവിധേയരായ റാഫേല്‍ യുദ്ധവിമാന ഇടപാടില്‍ വിവാദത്തിലായ അനില്‍ അംബാനി ഇന്ത്യ വിട്ടുപോകുന്നതു തടയണമെന്നാവശ്യപ്പെട്ട് സ്വീഡിഷ് ടെലികോം കമ്പനി എറിക്‌സണ്‍ സുപ്രിംകോടതിയെ സമീപിച്ചു. അനില്‍ അംബാനിയുടെ റിലയന്‍സ് കമ്മ്യൂണിക്കേഷന്‍ തങ്ങള്‍ക്ക് 500 കോടി രൂപ നല്‍കാനുണ്ടെന്നു ചൂണ്ടിക്കാട്ടിയാണ് അനിലും കമ്പനിയുടെ രണ്ടു മുതിര്‍ന്ന ഉദ്യോഗസ്ഥരും ഇന്ത്യ വിടുന്നത് തടയണമെന്നാവശ്യപ്പെട്ട് എറിക്‌സണ്‍ ഹരജി നല്‍കിയത്. അനിലിന്റെ കമ്പനിക്കെതിരേ കോടതിയലക്ഷ്യ നടപടികള്‍ സ്വീകരിക്കണമെന്നും എറിക്‌സണ്‍ ആവശ്യപ്പെട്ടിട്ടുണ്ട്.
റിലയന്‍സ് രാജ്യത്തെ നിയമ വ്യവസ്ഥയെ ബഹുമാനിക്കുന്നില്ലെന്ന് ഹരജിയില്‍ എറിക്‌സണ്‍ ചൂണ്ടിക്കാട്ടി. അനില്‍ അംബാനിയുടെ നടപടി കോടതി ഉത്തരവിന്റെ ലംഘനമാണ്. റിലയന്‍സ് മാനേജ്‌മെന്റിനെതിരേ കോടതിയലക്ഷ്യത്തിന് കേസെടുക്കുകയും അവര്‍ കോടതിയുടെ അനുമതിയില്ലാതെ രാജ്യം വിടുന്നത് തടയുകയും വേണം. നിയമം പരിപാലിക്കപ്പെടുന്നതിന് അത് അനിവാര്യമാണെന്നും എറിക്‌സണ്‍ ഹരജിയില്‍ ബോധിപ്പിച്ചു. 1,600 കോടി രൂപയായിരുന്നു എറിക്‌സന് അനില്‍ അംബാനിയുടെ കമ്പനി നല്‍കാനുണ്ടായിരുന്നത്. ഇതു സംബന്ധിച്ച കേസില്‍ കോടതിയിലുണ്ടാക്കിയ ഒത്തുതീര്‍പ്പ് പ്രകാരം തുക 550 കോടിയായി എറിക്‌സണ്‍ കുറച്ചു നല്‍കുകയായിരുന്നു.