തിരുവനന്തപുരം: യൂനിവേഴ്‌സിറ്റി കോളജില്‍ യൂനിറ്റ് രൂപീകരിച്ച് കെ.എസ്.യു. കെ.എസ്.യു സമരപ്പന്തലില്‍ വച്ച് സംസ്ഥാന പ്രസിഡന്റ് കെ.എം അഭിജിത്തിന്റെ സാന്നിധ്യത്തിലാണ് യൂനിറ്റ് രൂപീകരിച്ചത്.
അമല്‍ ചന്ദ്ര പ്രസിഡന്റായും ആര്യ എസ്. നായര്‍ വൈസ് പ്രസിഡന്റായും മറ്റു ഭാരവാഹികളെയും തിരഞ്ഞെടുത്തു. 18 വര്‍ഷത്തിനു ശേഷമാണ് യൂനിവേഴ്‌സിറ്റി കോളജില്‍ കെ.എസ്.യു യൂനിറ്റ് രൂപീകരിക്കുന്നത്.

അതിനിടെ വിദ്യാര്‍ഥിയെ എസ്.എഫ്.ഐ നേതാവ് കുത്തിവീഴിത്തിയതിനെ തുടര്‍ന്ന് അടച്ചിട്ട കോളജ് ഇന്ന് തുറന്നു. ഐ.ഡി ഉപയോഗിച്ചാണ് വിദ്യാര്‍ഥികളെ കോളജിലേക്ക് സുരക്ഷാ ഉദ്യോഗസ്ഥര്‍ കടത്തിവിട്ടത്.

അതേസമയം, യൂനിവേഴ്‌സിറ്റി കോളജിലേക്ക് കെ.എസ്.യു നടത്തിയ മാര്‍ച്ച് പൊലിസ് തടഞ്ഞു. കോളജിലെ വിദ്യാര്‍ഥികളെ മാത്രമേ കടത്തിവിടുകയുള്ളൂവെന്ന് പൊലിസ് അറിയിക്കുകയായിരുന്നു. എന്നാല്‍ കോളജിലേക്ക് വിദ്യാര്‍ഥികളെ കടത്തിവിടണമെന്നും എല്ലാ കോളജിലും പ്രവര്‍ത്തന സ്വാതന്ത്ര്യം വേണമെന്നും പുതുതായി രൂപീകരിച്ച കെ.എസ്.യു യൂനിറ്റ് ഭാരവാഹികള്‍ പറഞ്ഞു. കോളജില്‍ കെ.എസ്.യുവിന്റെ പ്രവര്‍ത്തനം ശക്തിപ്പെടുത്തുമെന്നും അവര്‍ മാധ്യമങ്ങളോട് പറഞ്ഞു.

സെക്രട്ടേറിയറ്റ് പടിക്കല്‍ കെ.എസ്.യു നടത്തിവരുന്ന അനിശ്ചിതകാല നിരാഹാര സമരം എട്ടാം ദിവസത്തിലേക്ക് കടന്നു. കെ.എസ്.യു സംസ്ഥാന പ്രസിഡന്റ് അഭിജിത്തിന്റെ നേതൃത്വത്തിലാണു സമരം നടക്കുന്നത്. സമരത്തെ പരിഹസിച്ച് മുഖ്യമന്ത്രി ഇന്നലെ രംഗത്തെത്തിയിരുന്നു.