ജമ്മു: ജമ്മു കശ്മീരിലെ ജില്ലാ വികസന കൗണ്‍സിലിലേക്ക് നടന്ന തെരഞ്ഞെടുപ്പില്‍ ഗുപ്കര്‍ മുന്നണിക്ക് ഉജ്ജ്വല വിജയം. 20 ജില്ലകളിലായി നടന്ന തെരഞ്ഞെടുപ്പില്‍ സഖ്യം കോണ്‍ഗ്രസിനൊപ്പം 13 ജില്ലകളില്‍ വെന്നിക്കൊടി നാട്ടി. ജമ്മുവില്‍ ആറ് ജില്ലകള്‍ ബി.ജെ.പി വിജയിച്ചു. പി.ഡി.പിയും നാഷണല്‍ കോണ്‍ഫറന്‍സും ചേര്‍ന്നതാണ് ഗുപ്കര്‍ സഖ്യം.

ജമ്മു മേഖലയില്‍ 69 സീറ്റുകളില്‍ ബി.ജെ.പി ക്ക് ലീഡ് ഉണ്ട്. എന്നാല്‍ കശ്മീര്‍ താഴ്‌വരയില്‍ 3 സീറ്റുകളില്‍ മാത്രമാണ് ലീഡ് ചെയ്യാനായത്. കശ്മീരിന്റെ പ്രത്യേക പദവി എടുത്തു കളയുന്ന അനുച്ഛേദം 370 റദ്ദാക്കിയതിനു ശേഷമുളള ആദ്യ ജനാധിപത്യ പ്രക്രിയ ആണ് ഡി.ഡി.സി തെരഞ്ഞെടുപ്പ്. ആ വിഷയം തന്നെയായിരുന്നു പ്രധാനമായും തെരഞ്ഞെടുപ്പില്‍ പാര്‍ട്ടികള്‍ ചര്‍ച്ചയാക്കിയതും.