കൊല്ലങ്കോട്: തമിഴ്‌നാട്ടില്‍ നിന്നും കേരളത്തിലേക്ക് ബസില്‍ കടത്തികൊണ്ടു വന്ന ചന്ദനം ഗോപാലപുരം ചെക്ക് പോസ്റ്റില്‍ വെച്ച് എക്‌സൈസ് സംഘം പിടികൂടി.
ചെക്ക് പോസ്റ്റില്‍ നടത്തിയ വാഹന പരിശോധനയിലാണ് തമിഴ്‌നാട് സര്‍ക്കാര്‍ ട്രാന്‍സ്‌പോര്‍ട്ട് ബസില്‍ സീറ്റിനടിയില്‍ ബാഗില്‍ സൂക്ഷിച്ച നിലയില്‍ 8.500 കിലോഗ്രാം ചന്ദനമുട്ടികള്‍ ലഭിച്ചത്. മുറിച്ചെടുത്ത നിലയില്‍ പതിനാലോളം  ചന്ദനത്തടികളാണ് സീറ്റിനടിയില്‍ ഒളിപ്പിച്ചിരുന്നത്.എന്നാല്‍ ചന്ദനം കടത്തിക്കൊണ്ടു വന്നവരെ കുറിച്ച് വിവരമില്ല.
ചിറ്റൂര്‍ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ വിനീത് കാരാണിസത്തിന്റെ നേതൃത്വത്തിലാണ് ചന്ദനമുട്ടികള്‍ പിടിച്ചെടുത്തത്.
പിടികൂടിയ ചന്ദന മുട്ടികള്‍ കൊല്ലങ്കോട് വനം വന്യജീവി വകുപ്പ് റെയ്ഞ്ച് ഓഫിസില്‍ ഏല്‍പ്പിച്ചു.