തിരുവനന്തുരം: നിയമസഭാ സമ്മേളനത്തിന് അനുമതി നിഷേധിച്ചതുമായി ബന്ധപ്പെട്ട മുഖ്യമന്ത്രിക്കുള്ള മറുപടിക്കത്തില്‍ സംസ്‌കൃത ശ്ലോകവും ഉദ്ധരിച്ച് ഗവര്‍ണര്‍. 'ശ്രേയാന്‍ സ്വധര്‍മോ വിഗുണ: പരധര്‍മാത്സ്വനുഷ്ഠിതാത് സ്വധര്‍മേനിധനം ശ്രേയ: പരധര്‍മോ ഭയാവഹ' എന്ന ശ്ലോകമാണ് കത്തില്‍ ഉദ്ധരിച്ചത്.

'ഒരാള്‍ക്ക് വിധിക്കപ്പെട്ടിട്ടുള്ള ചുമതലകള്‍ തെറ്റോടുകൂടിയാണെങ്കിലും നിറവേറ്റുകയെന്നത്, അന്യരുടെ കര്‍ത്തവ്യങ്ങള്‍ ഭംഗിയായി ചെയ്യുന്നതിനേക്കാള്‍ നല്ലതാകുന്നു. സ്വന്തം കൃത്യനിര്‍വഹണത്തില്‍ നാശമോ തെറ്റോ സംഭവിക്കുന്നത് മറ്റുള്ളവന്റെ കര്‍മ്മം ചെയ്യുന്നതിനേക്കാള്‍ ശ്രേയസ്‌ക്കരം തന്നെയാകുന്നു. അന്യരുടെ വഴി സ്വീകരിക്കുന്നത് ആപല്‍ക്കരമാണ്' എന്ന അര്‍ഥം വരുന്ന ശ്ലോകമാണ് ഗവര്‍ണര്‍ ഉദ്ധരിച്ചത്.

നിയമസഭാ സമ്മേളനം നടത്തുന്നതിനുള്ള അനുമതി തേടിയത് ചട്ടപ്രകാരമല്ലെന്നും അനുമതി നിഷേധിച്ചതില്‍ ഭരണഘടനാ ലംഘനമുണ്ടായിട്ടില്ലെന്നും മുഖ്യമന്ത്രിക്ക് അയച്ച മറുപടിക്കത്തില്‍ ഗവര്‍ണര്‍ വ്യക്തമാക്കി.

മുഖ്യമന്ത്രിയുടെ കത്ത് തനിക്കു ലഭിക്കും മുന്‍പ് മാധ്യമങ്ങളില്‍ ലഭിച്ചതില്‍ ഗവര്‍ണര്‍ അതൃപ്തി അറിയിക്കുകയും ചെയ്തു. അതീവ രഹസ്യസ്വഭാവമുള്ളത് എന്നു പറഞ്ഞാണ് മുഖ്യമന്ത്രിയുടെ കത്ത് ലഭിക്കുന്നത്. എന്നാല്‍ തനിക്കു കത്ത് കിട്ടുമ്പോള്‍ തന്നെ ചാനലില്‍ അത് വാര്‍ത്തയാകുന്നുവെന്നും ഗവര്‍ണര്‍ കത്തില്‍ പറയുന്നു. എന്താണ് പ്രത്യേക സമ്മേളനം ചേരാനുള്ള അടിയന്തര സാഹചര്യം എന്ന ചോദ്യത്തിനു സര്‍ക്കാര്‍ തൃപ്തികരമായ മറുപടി നല്‍കിയില്ലെന്നും ഗവര്‍ണറുടെ മറുപടിക്കത്തില്‍ പറയുന്നു.