കഴക്കൂട്ടം: കോളജ് യൂനിയന്‍ തെരഞ്ഞെടുപ്പില്‍ കേരളത്തിലെ ആദ്യ ട്രാന്‍സ്‌ജെന്‍ഡര്‍ സ്ഥാനാര്‍ഥിയായി കടന്ന് വന്ന നജീബ് എന്ന നാദിറ മെഹ്‌റിന്‍ പുതുചരിത്രം കുറിക്കുകയാണ്. കേരള സര്‍വകലാശാലയ്ക്ക് കീഴിലെ കോളജ് യൂനിയന്‍ തിരഞ്ഞെടുപ്പില്‍ തിരുവനന്തപുരം ജില്ലയിലെ തോന്നക്കല്‍ എ.ജെ കോളജ് ഓഫ് ആര്‍ട്‌സ് ആന്‍ഡ് സയന്‍സ് കോളജിലാണ് ട്രാന്‍സ്‌ജെന്‍ഡര്‍ സ്ഥാനാര്‍ഥിയെ രംഗ പ്രവേശനം ചെയ്ത് എ.ഐ.എസ്.എഫ് പുതുചരിത്രം കുറിച്ചിരിക്കുന്നത്.
മൂന്നാം വര്‍ഷ മാധ്യമ വിദ്യാര്‍ഥിയും സാമൂഹ്യ പ്രവര്‍ത്തനങ്ങളില്‍ നിറസാനിധ്യവുമായ നാദിറ ജില്ലയിലെ പരുത്തിക്കുഴി സ്വദേശിയാണ്. ട്രാന്‍സ് ജെന്‍ഡര്‍ എന്നതിന്റെ പേരില്‍ ബന്ധുക്കളും കൂടപ്പിറപ്പുകളും വര്‍ഷങ്ങള്‍ക്ക് മുന്നേ ഒറ്റപ്പെടുത്തി അകറ്റി നിര്‍ത്തിയപ്പോള്‍ സഹായിക്കാന്‍ നിരവധി സുമനസുകള്‍ രംഗത്തെത്തി. ഇന്ന് അവരുടെ തണലിലാണ് ഈ പത്തൊന്‍പതുകാരി പഠനം തുടരുന്നത്. സഹായിക്കാനും സ്‌നേഹം തരാനും ട്രാന്‍സ്‌ജെന്‍ഡര്‍ എന്ന വലിയൊരു സമൂഹവും ഒപ്പം എ.ജെ കോളജിലെ മുഴുവന്‍ വിദ്യാര്‍ഥി വിദ്യാര്‍ഥിനികളും തന്നോടൊപ്പമുണ്ടെന്ന് നാദിറ പറഞ്ഞു.
കേരളത്തിലെ പാര്‍ശ്വവത്കൃത വിഭാഗങ്ങള്‍ക്കായി പ്രവര്‍ത്തിക്കുന്ന ക്വാറിഥം സി.ബി.ഒ സംഘടനയുടെ ഡയറക്ടര്‍ ബോര്‍ഡ് അംഗമായ നാദിറ ഇന്ത്യയിലെ ഏറ്റവും വലിയ ട്രാന്‍സ്‌ജെഡര്‍ ഫാഷന്‍ ഷോ ആയ എം എക്‌സ് മാനവീയം 2018 ന്റെ ടൈറ്റില്‍ വിന്നറാണ്.
കേരള സര്‍ക്കാര്‍ ഏര്‍പ്പെടുത്തിയ ട്രാന്‍സ് സ്‌കോളര്‍ഷിപ്പിനും ഈ മാധ്യമ വിദ്യാര്‍ഥി അര്‍ഹത നേടിയിട്ടുണ്ട്. നാദിറ തന്റെ ലിംഗമാറ്റ ശസ്ത്രക്രിയക്ക് ഉള്ള തയാറെടുപ്പിലാണ്. 2019 മെയ് മാസം ഈ ശസ്ത്രക്രിയ കേരളത്തില്‍ വെച്ച് നടക്കുമെന്നും നാദിറ പറഞ്ഞു. കോളജിലെ മുഴുവന്‍ പരിപാടികളിലും നാദിറയുടെ ഇടപെടല്‍ കോളജിന് ഏറെ നേട്ടം പകരുന്നതാണെന്നും നാദിറ കോളജിന് ഏറെ അഭിമാനമാണെന്നും പ്രിന്‍സിപ്പല്‍ മുഹമ്മദ്കുഞ്ഞ് പറഞ്ഞു.