കൊടുങ്ങല്ലൂര്‍: എടവിലങ്ങില്‍ വീട് കയറി ആക്രമണം അപകടത്തില്‍ പരിക്കേറ്റ് ചികിത്സയില്‍ കഴിയുന്ന യുവാവ് ഉള്‍പ്പടെ നാല് പേര്‍ക്ക് മര്‍ദനമേറ്റു. അക്രമിയെ പിടികൂടാനെത്തിയ പൊലിസിനെ കൈയേറ്റം ചെയ്തു. സ്റ്റേഷനിലും പ്രതിയുടെ പരാക്രമം.
കാര ഫിഷറീസ് സ്‌കൂളിന് പടിഞ്ഞാറുവശം രാത്രി ഏഴ് മണിയോടെയായിരുന്നു സംഭവം. മദ്യലഹരിയിലെത്തിയ അരവീട്ടില്‍ സുജിത്ത് (25) അയല്‍പക്കത്തെ വീട്ടില്‍ കയറി അക്രമം നടത്തുകയായിരുന്നു. ബൈക്കപകടത്തില്‍ പരിക്കേറ്റ് കഴിയുന്ന കുഞ്ഞു മാക്കാന്‍ പുരക്കല്‍ പരേതനായ ഷിബുവിന്റെ മകന്‍ അഭിനവ് (17), അമ്മ സിന്ധു (38) ,ബന്ധുക്കളായ ഋത്വിക് ( 16) ,സനീഷ് (46) എന്നിവര്‍ക്കാണ് മര്‍ദ്ദനമേറ്റത് ഇവരെ കൊടുങ്ങല്ലൂര്‍ താലൂക്ക് ഗവ: ആശുപത്രിയില്‍ പ്രവേശിപ്പിച്ചു. അഭിനവിനെയും അമ്മയെയും മര്‍ദ്ദിക്കുന്നത് കണ്ട് ഓടി വന്ന ബന്ധുക്കളെയും സുജിത്ത് ആക്രമിക്കുകയായിരുന്നു. സംഭവമറിഞ്ഞെത്തിയ കൊടുങ്ങല്ലൂര്‍ എസ്.ഐ കെ.ജെ ജിനേഷിനെയും പൊലിസുകാരെയും പ്രതി കൈയേറ്റം ചെയ്തു .ബലം പ്രയോഗിച്ച് കസ്റ്റഡിയിലെടുത്ത് സ്റ്റേഷനിലെത്തിച്ചപ്പോഴും ഇയാള്‍ പൊലിസിന് നേരെ പരാക്രമം തുടര്‍ന്നു.