നെല്ലിയാമ്പതി: പ്രളയത്തെ തുടര്‍ന്ന് നിയന്ത്രിക്കപ്പെട്ട ഗതാഗത സംവിധാനം പുനസ്ഥാപിക്കാത്തതിനാല്‍ വീണ്ടും ഒറ്റപ്പെട്ട് നെല്ലിയാമ്പതിക്കാര്‍. ബസ് സര്‍വിസുകള്‍ പൂര്‍ണമായും നിലച്ചത് രൂക്ഷമായ ഒറ്റപ്പെടലിലേക്ക് നയിച്ചു.
പ്രളയ സമയത്ത് എത്തിച്ച ഭക്ഷ്യസാധനങ്ങുളുടെ ശേഖരം കുറഞ്ഞതും പുതിയ സാധനങ്ങള്‍ എത്തിക്കാന്‍ കഴിയാത്തതും ഭക്ഷ്യക്ഷാമം വര്‍ദ്ധിപ്പിച്ചിരിക്കുകയാണ്. പുറത്തു നിന്നുള്ള അധ്യാപര്‍ക്കും ഉദ്യോഗസ്ഥര്‍ക്കും ഇങ്ങോട്ട് വരാനും ഇവിടെയുള്ളവര്‍ക്ക് പുറത്തേക്ക് പോകുന്നതിനും വല്ലപ്പോഴും വരുന്ന ജീപ്പുകളെ ആശ്രയിക്കേണ്ട അവസ്ഥയിനാണ്.
പ്രളയത്തിനു മുമ്പ് എട്ടില്‍പരം കെ.എസ്.ആര്‍.ടി.സി സര്‍വിസുകള്‍ ഉണ്ടായിരുന്നിടത്ത് ഇപ്പോള്‍ ഒരു സര്‍വിസ് പേലും നടക്കുന്നില്ല. റോഡിന്റെ ശോചനീയാവസ്ഥ കണക്കിലെടുത്താണ് ഗതാഗത നിയന്ത്രണമെന്നാണ് ഉദ്യോഗസ്ഥര്‍ പറയുന്നത്. എന്നാല്‍ കഴിഞ്ഞ ദിവസം ഇതേ റോഡിലൂടെയാണ് ഷൂട്ടിംങ് ആവശ്യത്തിനായി ആനയെ കൊണ്ടുപോയത്.
ആന പോകുന്ന വഴിയിലൂടെ ഒരു ആന ബസ്സെങ്കിലും അനുവതിക്കണമെന്നാണ് നാട്ടുകാരുടെ ആവശ്യം. ഇല്ലാത്തപക്ഷം പ്രത്യക്ഷ സമരത്തിനിറങ്ങാന്‍ വരെ ആലോചിക്കുന്നതായി പ്രദേശവായികള്‍ പറഞ്ഞു.