ന്യൂഡല്‍ഹി: പോട്ട പിന്‍വലിച്ചത് വോട്ടുബാങ്ക് രാഷ്ട്രീയം ലക്ഷ്യമിട്ടാണെന്ന ആരോപണമുന്നയിച്ച അമിത് ഷാക്ക് കണക്കും ചരിത്രവും പറഞ്ഞ് പഠിപ്പിച്ച് കോണ്‍ഗ്രസ്. പോട്ട ദുരുപയോഗം ചെയ്യുന്നുവെന്ന പരാതിയെത്തുടര്‍ന്ന് പുനരവലോകന കമ്മറ്റി രൂപീകരിച്ചത് വാജ്‌പേയി സര്‍ക്കാറാണെന്ന് കോണ്‍ഗ്രസ് നേതാവ് മനീഷ് തിവാരി പറഞ്ഞു. യു.എ.പി.എ ഭേദഗതി ബില്‍ സംബന്ധിച്ച് ലോക്‌സഭയില്‍ സംസാരിക്കുകയായിരുന്നു മനീഷ് തിവാരി.

പോട്ട പ്രകാരം 1,031 പേരെ അറസ്റ്റ് ചെയ്തപ്പോള്‍ അതില്‍ 13 പേരെ മാത്രമാണ് കോടതി കുറ്റക്കാരെന്ന് കണ്ടെത്തിയത്. ബാക്കിയെല്ലാം ദുരുപയോഗമായിരുന്നുവെന്ന് ഇതില്‍ നിന്ന് വ്യക്തമല്ലേയെന്ന് മനീഷ് തിവാരി ചോദിച്ചു. ദുരുപയോഗമുണ്ടാകുമെന്ന അതേ കാരണം കൊണ്ടുതന്നെയാണ് യു.എ.പി.എ ബില്ലിനെ എതിര്‍ക്കുന്നതെന്നും മനീഷ് തിവാരി പറഞ്ഞു.