നെയ്യാറ്റിന്‍കര (തിരുവനന്തപുരം): തര്‍ക്കഭൂമിയിലെ താമസം ഒഴിപ്പിക്കുന്നതിനെത്തിയ ഉദ്യോഗസ്ഥര്‍ക്കു മുന്നില്‍ തീകൊളുത്തിയ ദമ്പതികള്‍ മരിച്ചു. നെയ്യാറ്റിന്‍കര പോങ്ങയില്‍ നെട്ടതോട്ടം കോളനിയില്‍ രാജന്‍(47), ഭാര്യ അമ്പിളി (38) എന്നിവരാണ് മരിച്ചത്.
70 ശതമാനം പൊള്ളലേറ്റ രാജന്‍ ഇന്നലെ പുലര്‍ച്ചെയും 40 ശതമാനം പൊള്ളലേറ്റ അമ്പിളി ഇന്നലെ വൈകിട്ടുമാണ് മരിച്ചത്. രണ്ടുപേരും തിരുവനന്തപുരം മെഡിക്കല്‍ കോളജ് ആശുപത്രിയില്‍ ചികിത്സയിലായിരുന്നു. കഴിഞ്ഞ 22ാം തിയതിയായിരുന്നു സംഭവം. അയല്‍വാസിയുടെ ഭൂമിയില്‍ ഇവര്‍ താല്‍ക്കാലിക ഷെഡ് നിര്‍മിച്ചു താമസിച്ചുവരികയായിരുന്നു. കോടതി ഉത്തരവുപ്രകാരം ഷെഡ് പൊളിച്ചുമാറ്റാന്‍ പൊലിസും ഉദ്യോഗസ്ഥരും എത്തിയപ്പോഴാണ് പെട്രോള്‍ ഒഴിച്ച് ഇരുവരും തീകൊളുത്തിയത്.