മക്ക: വിശുദ്ധ ഹജ്ജ് തീര്‍ത്ഥാടനത്തിനായി ലോകത്തിന്റെ വിവിധ ഭാഗങ്ങളില്‍ നിന്നുള്ള ഹാജിമാരുടെ വരവ് തുടരുന്നു. ഇതിനകം പുണ്യ ഭൂമികളില്‍ എത്തിച്ചേര്‍ന്ന വിദേശ ഹാജിമാര്‍ ഏഴര ലക്ഷമാണ്. ജിദ്ദ ഹജ്ജ് ടെര്‍മിനല്‍ വഴിയും മദീന അന്താരാഷ്ട്ര വിമാനത്താവളം വഴിയും കൂടാതെ കടല്‍, കര മാര്‍ഗ്ഗവുമുള്ള തീര്‍ത്ഥാടകരുടെ വരവും തുടങ്ങിയിട്ടുണ്ട്. ഇതിനകം സഊദിയിലെത്തിയ തീര്‍ത്ഥാടകരുടെ എണ്ണം സഊദി ജാവാസാത്ത് വിഭാഗം പുറത്ത് വിട്ടു.

ലോകത്തിന്റെ വിവിധ ഭാഗങ്ങളില്‍ നിന്നും ബുധനാഴ്ച്ച ഉച്ച വരെയായി 733506 തീര്‍ത്ഥാടകരാണ് എത്തിച്ചേര്‍ന്നത്. ഇതില്‍ വിമാന മാര്‍ഗ്ഗം വഴി 705360 തീര്‍ത്ഥാടകരും 19025 തീര്‍ത്ഥാടകര്‍ ബസ് മാര്‍ഗ്ഗവും 9121 തീര്‍ത്ഥാടകര്‍ കപ്പല്‍ മാര്‍ഗ്ഗവുമാണ് എത്തിച്ചേര്‍ന്നത്.
ഇന്ത്യയില്‍ നിന്നും ഇന്ത്യന്‍ ഹജ്ജ് കമ്മിറ്റി മുഖേനയുള്ള തീര്‍ത്ഥാടകരുടെ വരവും തുടരുകയാണ്. ഇന്ത്യയില്‍ നിന്നും ഇതിനകം എണ്‍പത്തിനായിരത്തോളം തീര്‍ത്ഥാടകരാണ് വിശുദ്ധ മണ്ണിലിറങ്ങിയത്. ഇവരില്‍ അമ്പതിനായിരത്തിലധികം തീര്‍ത്ഥാടകര്‍ മക്കയിലാണുള്ളത് . മദീനയില്‍ നേരത്തെ വന്നിറങ്ങിയ തീര്‍ത്ഥാടകരുടെ മക്ക യാത്ര പുരോഗമിക്കുകയാണ്. ഇരുപതിനായിരത്തോളം തീര്‍ത്ഥാടകര്‍ മാത്രമാണ് നിലവില്‍ മദീനയിലുള്ളത്. തുടര്‍ ദിവസങ്ങളില്‍ ഇവരും മക്കയിലേക്ക് തിരിക്കും.

നിലവില്‍ ഇന്ത്യന്‍ തീര്‍ത്ഥാടകര്‍ ജിദ്ദ അന്താരാഷ്ട്ര വിമാനത്താവളത്തിലാണ് ഇറങ്ങുന്നത്. ഇവര്‍ ഇവിടെ നിന്നും നേരെ മക്കയിലെ താമസ കേന്ദ്രങ്ങളിലേക്കാണ് എത്തിച്ചേരുന്നത്. ഹജ്ജ്ജിന് ശേഷമായിരിക്കും ഇവരുടെ മദീന സന്ദര്‍ശനം. മക്ക മദീന എന്നിവിടങ്ങിലായി ഇതിനകം 27435 തീര്‍ത്ഥാടകര്‍ക്ക് ഔട്ട് പേഷ്യന്റ് ക്ലിനിക്കുകള്‍ വഴിയും 4816 തീര്‍ത്ഥാടകര്‍ക്ക് മൊബൈല്‍ ക്ലിനിക്കുകള്‍ വഴിയും ഇന്ത്യന്‍ ഹജ്ജ് മിഷന്‍ ചികിത്സ നല്‍കിയിട്ടുണ്ട്.