മക്ക: വിശുദ്ധ ഹജ്ജ് കര്‍മത്തിനായി ലോകത്തിന്റെ വിവിധ ഭാഗങ്ങളില്‍നിന്നുള്ള തീര്‍ഥാടകരുടെ വരവുതുടരുന്നു.
ജിദ്ദ ഹജ്ജ് ടെര്‍മിനല്‍ വഴിയും മദീന അന്താരാഷ്ട്ര വിമാനത്താവളം വഴിയും കൂടാതെ കടല്‍, കര മാര്‍ഗവുമുള്ള തീര്‍ഥാടകരുടെ വരവും തുടങ്ങിയിട്ടുണ്ട്. ഇതിനകം സഊദിയിലെത്തിയ തീര്‍ഥാടകരുടെ എണ്ണം സഊദി ജാവാസാത്ത് വിഭാഗം പുറത്തുവിട്ടു.
ലോകത്തിന്റെ വിവിധ ഭാഗങ്ങളില്‍നിന്ന് ഇന്നലെ ഉച്ചവരെയായി എട്ടര ലക്ഷം തീര്‍ഥാടകരാണ് എത്തിച്ചേര്‍ന്നത്.
വിമാനമാര്‍ഗം 7.6 ലക്ഷം തീര്‍ഥാടകരും ബസ് മാര്‍ഗം 23,000 തീര്‍ഥാടകരും 9121 തീര്‍ഥാടകര്‍ കപ്പല്‍ മാര്‍ഗവുമാണ് എത്തിച്ചേര്‍ന്നത്. ഇന്ത്യയില്‍നിന്ന് ഇതിനകം എണ്‍പതിനായിരത്തിലധികം തീര്‍ഥാടകരാണ് വിശുദ്ധ മണ്ണിലിറങ്ങിയത്.
ഇവരില്‍ അറുപതിനായിരത്തോളം പേര്‍ മക്കയിലാണുള്ളത്. മദീനയില്‍ നേരത്തെ വന്നിറങ്ങിയ തീര്‍ഥാടകരുടെ മക്ക യാത്ര പുരോഗമിക്കുകയാണ്. നിലവില്‍ പതിനേഴായിരത്തോളം തീര്‍ഥാടകര്‍ മാത്രമാണ് മദീനയിലുള്ളത്.