സ്വന്തം ലേഖകന്‍

തിരുവനന്തപുരം: സംസ്ഥാനത്തെ ജില്ലാ, ബ്ലോക്ക്, ഗ്രാമ പഞ്ചായത്തുകളില്‍ അധ്യക്ഷന്‍മാരെയും ഉപാധ്യക്ഷന്‍മാരെയും തെരഞ്ഞെടുത്തു. രാഷ്ട്രീയ സമവാക്യങ്ങളെ തലകീഴായി മറിക്കുന്ന കൂട്ടുകെട്ടുകളും നീക്കങ്ങളും നറുക്കെടുപ്പുമൊക്കെയായി നാടകീയമായിരുന്നു പലയിടങ്ങളിലെയും അധ്യക്ഷ തെരഞ്ഞെടുപ്പ്. സംസ്ഥാനത്തെ 14 ജില്ലാ പഞ്ചായത്തുകളില്‍ 11 ഇടത്ത് എല്‍.ഡി.എഫും മൂന്നിടത്ത് യു.ഡി.എഫും അധികാരത്തിലെത്തി. ഇരുമുന്നണികള്‍ക്കും തുല്യസീറ്റുണ്ടായിരുന്ന വയനാട്ടില്‍ നറുക്കെടുപ്പിലൂടെയാണ് യു.ഡി.എഫ് അധികാരം നിലനിര്‍ത്തിയത്. കോണ്‍ഗ്രസിലെ സംഷാദ് മരക്കാറെ അധ്യക്ഷനായി തെരഞ്ഞെടുത്തു. എല്‍.ഡി.എഫിനാണ് വൈസ് പ്രസിഡന്റ് സ്ഥാനം. എറണാകുളവും മലപ്പുറവുമാണ് യു.ഡി.എഫ് ഭരണമുള്ള മറ്റ് ജില്ലാപഞ്ചായത്തുകള്‍. എറണാകുളത്ത് ഉല്ലാസ് തോമസും മലപ്പുറത്ത് മുസ്‌ലിം ലീഗിലെ എം.കെ റഫീഖയും അധ്യക്ഷ സ്ഥാനത്തെത്തി. എല്‍.ഡി.എഫ് അധികാരത്തിലെത്തിയ തിരുവനന്തപുരം ജില്ലാ പഞ്ചായത്തില്‍ ഡി.സുരേഷ്‌കുമാറും കൊല്ലത്ത് സാം കെ.ഡാനിയലും പത്തനംതിട്ടയില്‍ അഡ്വ. ഓമല്ലൂര്‍ ശങ്കരനും ആലപ്പുഴയില്‍ കെ.ജി രാജേശ്വരിയും കോട്ടയത്ത് നിര്‍മല ജിമ്മിയും ഇടുക്കിയില്‍ ജിജി കെ.ഫിലിപ്പും തൃശൂരില്‍ പി.കെ ഡേവിസും പാലക്കാട് കെ.ബിനുമോളും കോഴിക്കോട് കാനത്തില്‍ ജമീലയും കണ്ണൂരില്‍ പി.പി ദിവ്യയും കാസര്‍കോട് ബേബി ബാലകൃഷ്ണനും അധ്യക്ഷ സ്ഥാനത്തെത്തി. 

തിരുവനന്തപുരത്തും ആലപ്പുഴയിലും എതിരില്ലാതെയായിരുന്നു തെരഞ്ഞെടുപ്പ്. 

 റാന്നി പഞ്ചായത്തില്‍ ബി.ജെ.പി പിന്തുണയോടെ എല്‍.ഡി.എഫ് അധികാരത്തിലെത്തിയെങ്കിലും രാജിവയ്ക്കുമെന്ന് അറിയിച്ചിട്ടുണ്ട്. രമേശ് ചെന്നിത്തലയുടെ പഞ്ചായത്തായ തൃപ്പെരുന്തുറയില്‍ യു.ഡി.എഫ് പിന്തുണയോടെ എല്‍.ഡി.എഫ് ഭരണത്തിലെത്തി. 

കൊല്ലം പോരുവഴിയില്‍ എസ്.ഡി.പി.ഐ പിന്തുണയോടെ യു.ഡി.എഫ് അധികാരം നേടി. കോഴിക്കോട് അഴിയൂരില്‍ യു.ഡി.എഫ്-ആര്‍.എം.പി സഖ്യം അധികാരത്തിലെത്തി. 

തിരുവനന്തപുരം വെമ്പായത്ത് 25 വര്‍ഷത്തിനുശേഷം യു.ഡി.എഫ് ഭരണത്തിലെത്തി. ഇ.എം.എസിന്റെ നാടായ ഏലംകുളത്ത് നാല്‍പതുവര്‍ഷത്തിനുശേഷം യു.ഡി.എഫ് അധികാരത്തിലെത്തി.