ടോക്യോ: ജപ്പാന്‍ ഓപ്പണ്‍ ബാഡ്മിന്റണിന്റെ സെമിയില്‍ പ്രവേശിച്ച് ഇന്ത്യന്‍ താരം സായ് പ്രണീത്. ഇന്നലെ നടന്ന ക്വാര്‍ട്ടറില്‍ ഇന്തോനേഷ്യയുടെ ടോമി സുഗിയാര്‍തോയെ പരാജയപ്പെടുത്തിയാണ് പ്രണീത് സെമിയില്‍ പ്രവേശിച്ചത്.
ഇതോടെ സായ് പ്രണീത് ജപ്പാന്‍ ഓപ്പണ്‍ പുരുഷ സിംഗിള്‍സ് സെമിയിലെത്തുന്ന ആദ്യ ഇന്ത്യന്‍ താരമാവുകയും ചെയ്തു. 21-12, 21-15 എന്ന സ്‌കോറിനായിരുന്നു പ്രണീതിന്റെ വിജയം.
36 മിനുട്ട് നീണ്ട പോരാട്ടത്തിനൊടുവിലായിരുന്നു പ്രണീതിന്റെ ജയം. ഈ വര്‍ഷം സായ് പ്രണീതിന്റെ രണ്ടാം സെമി ഫൈനലാണ്. ടോപ് സീഡായ ജാപ്പനീസ് താരം കെന്റോ മൊമോട്ടയാണ് സെമിയില്‍ സായ് പ്രണീതിന്റെ എതിരാളി.
ക്വാര്‍ട്ടറില്‍ ഇന്തോനേഷ്യയുടെ ആന്റണി സിനിസുക ഗിന്റിങ്ങിനെ പരാജയപ്പെടുത്തിയാണ് മൊമോട്ട സെമിയിലെത്തിയത്.
അതേസമയം ജപ്പാന്‍ താരം അകാനെ യമാഗുച്ചിയോട് പരാജയപ്പെട്ട് ഇന്ത്യന്‍ പ്രതീക്ഷയായിരുന്നു പി.വി സിന്ധു പുറത്തായി.
ഒരാഴ്ചക്കിടെ രണ്ടാം തവണയാണ് സിന്ധു യമാഗുച്ചിയോട് പരാജയപ്പെടുന്നത്. ഇന്തോനേഷ്യന്‍ ഓപ്പണിലായിരുന്നു സിന്ധു യമാഗുച്ചിയോട് പരാജയപ്പെട്ടത്. 18-21, 15-21 എന്ന സ്‌കോറിനായിരുന്നു സിന്ധുവിന്റെ തോല്‍വി.