ന്യൂഡല്‍ഹി: കണ്ണൂരില്‍ യൂത്ത് കോണ്‍ഗ്രസ് പ്രവര്‍ത്തകര്‍ കാളക്കുട്ടിയെ കൊന്നതില്‍ പ്രതിഷേധിച്ച് എ.ഐ.സി.സി ആസ്ഥാനത്തേക്ക് യുവമോര്‍ച്ച പ്രവര്‍ത്തകര്‍ പ്രകടനം നടത്തി. യുവമോര്‍ച്ച ഡല്‍ഹി ഘടകം പ്രസിഡന്റ് സുനില്‍ യാദവിന്റെ നേതൃത്വത്തില്‍ നടത്തിയ മാര്‍ച്ച് സംഘര്‍ഷത്തില്‍ കലാശിച്ചു. പ്രതിഷേധക്കാരെ പൊലിസ് ബാരിക്കേഡ് ഉയര്‍ത്തി തടഞ്ഞു.
ഇത് മറികടന്ന പ്രവര്‍ത്തകരും പൊലിസും തമ്മില്‍ ഉന്തും തള്ളുമുണ്ടായി. ജലപീരങ്കി പ്രയോഗിച്ചാണ് പ്രതിഷേധക്കാരെ പിരിച്ചുവിട്ടത്. സോണിയയുടെയും രാഹുലിന്റെയും കോലം കത്തിച്ച പ്രവര്‍ത്തകര്‍ റോഡില്‍ ഗോ പൂജയും നടത്തി. കേരളത്തിലെ വിഷയം ഉന്നയിച്ച് ഇന്നലെ ഡല്‍ഹിയിലെ കേരളാ ഹൗസിലേക്ക് ശിവസേനയും പ്രകടനം നടത്തിയിരുന്നു.