കൊച്ചി: ഡോക്ടറെ മര്‍ദിച്ച കേസിലെ മെഡിക്കല്‍ രേഖകള്‍ നഷ്ടപ്പെട്ട സംഭവത്തില്‍ പൊലിസ് ഹെഡ്ക്വാട്ടേഴ്‌സ് എ.ഐ.ജി വി.ഗോപാലകൃഷ്ണനെതിരേ കേസ് രജിസ്റ്റര്‍ ചെയ്തതു ശരിയായില്ലെന്ന ചീഫ് സെക്രട്ടറി നളിനി നെറ്റോയുടെ നിയമോപദേശവും ഇതിന്മേലുള്ള തുടര്‍ നടപടികളും ഹൈക്കോടതി സ്റ്റേ ചെയ്തു.
ഈ കേസില്‍ ആഭ്യന്തര വകുപ്പ് അഡീ.ചീഫ് സെക്രട്ടറിയായിരിക്കെ നളിനി നെറ്റോ ഡി.ജി.പിക്ക് നല്‍കിയ നിയമോപദേശവും ഇതിന്മേല്‍ തുടര്‍ നടപടിയെടുക്കാന്‍ നല്‍കിയ കത്തും ചോദ്യം ചെയ്ത് തിരുവനന്തപുരം ശ്രീചിത്ര തിരുനാള്‍ മെഡിക്കല്‍ ഇന്‍സ്റ്റിറ്റ്യൂട്ടിലെ ന്യൂറോ സര്‍ജന്‍ ഡോ. മാത്യു എബ്രഹാം നല്‍കിയ ഹരജിയിലാണ് ഇടക്കാല ഉത്തരവ്.
ഗോപാലകൃഷ്ണനെതിരായ കേസ് തിരുവനന്തപുരം മജിസ്‌ട്രേറ്റ് കോടതിയുടെ പരിഗണനയിലാണ്. അതേസമയം ഗോപാലകൃഷ്ണന്‍ നല്‍കിയ പരാതിയില്‍ പൊലിസ് മറ്റൊരു കേസുമെടുത്തു. ഈ സാഹചര്യത്തില്‍ സമാന സംഭവത്തില്‍ രണ്ടാമതൊരു എഫ്.ഐ.ആര്‍ ഇട്ടത് ശരിയായില്ലെന്ന് നളിനി നെറ്റോ മാര്‍ച്ച് 31 ന് ഡി.ജി.പിക്ക് നിയമോപദേശം നല്‍കി. ഇതു നിയമവിരുദ്ധമാണെന്നാണ് മാത്യു എബ്രഹാമിന്റെ ആരോപണം.