കല്‍പ്പറ്റ: സംസ്ഥാന സര്‍ക്കാരിനെതിരേ ആഞ്ഞടിച്ച് മാവോയിസ്റ്റുകള്‍. പ്രളയം ഭരണകൂട നിര്‍മിതമാണെന്ന ആരോപണവുമായാണ് മാവോയിസ്റ്റുകളുടെ കനല്‍പാത എന്ന ന്യൂസ് ബുള്ളറ്റിന്‍ പ്രത്യക്ഷപ്പെട്ടത്. ഡാമുകള്‍ പൊളിക്കണമെന്നും ബുള്ളറ്റിനില്‍ പറയുന്നു. നാടുകാണി പീപ്പിള്‍ ലിബറേഷന്‍ ഗറില്ല ആര്‍മി (പി.എല്‍.ജി.എ) കഴിഞ്ഞമാസം പുറത്തിറക്കിയതാണ് ബുള്ളറ്റിന്‍.
കഴിഞ്ഞ ദിവസം വയനാട് പ്രസ് ക്ലബിലാണ് ബുള്ളറ്റിന്‍ ലഭിച്ചത്. മഹാപ്രളയം ഭരണകൂടത്തിന്റെ സൃഷ്ടിയാണ്. ജനങ്ങളുടെ ജീവന്‍കൊണ്ട് പന്താടിയ ഉദ്യോഗസ്ഥ-ഭരണകൂട സംവിധാനത്തെ ചോദ്യം ചെയ്യണം. വന്‍കിട ഡാമുകള്‍ പൊളിച്ചുമാറ്റണമെന്ന് പറയുന്ന ബുള്ളറ്റിനില്‍, കുന്നുകള്‍ ഇടിച്ചുനിരത്തിയും പാറമടകള്‍ അനുവദിച്ചും വയലുകള്‍ മണ്ണിട്ട് നികത്തിയും ഭരണകൂടവും മൂലധന ശക്തികളും നടത്തുന്നത് ജനവിരുദ്ധ വികസന ഭീകരതയാണെന്നും ആരോപിക്കുന്നു. പശ്ചിമഘട്ട സംരക്ഷണം ജനകീയ രാഷ്ട്രീയാധികാരത്തിലുടെയേ സാധ്യമാകുവെന്നും ബുള്ളറ്റിനില്‍ പറയുന്നു. ഭരണകൂടത്തിന്റെ കര്‍ഷക വഞ്ചനയാണ് കാഞ്ഞിരത്തിനാല്‍ ഭൂമി വിഷയത്തില്‍ കാണുന്നതെന്ന വിമര്‍ശനവും ബുള്ളറ്റിനിലുണ്ട്.
കാഞ്ഞിരത്തിനാല്‍ കുടുംബത്തിന് നീതി ലഭിക്കുന്നതിന് മുഴുവന്‍ ബഹുജനങ്ങളും സംഘടനകളും ഐക്യപ്പെടണമെന്നും സമരരംഗത്തിറങ്ങണമെന്നും ബുള്ളറ്റിന്‍ ആഹ്വാനം ചെയ്യുന്നു. കാഞ്ഞിരത്തിനാല്‍ കുടുംബത്തിന്റെ സമരത്തിന് മാവോയിസ്റ്റ് പ്രസ്ഥാനം ഐക്യദാര്‍ഢ്യം പ്രഖ്യാപിക്കുന്നതായും ബുള്ളറ്റിനില്‍ പറയുന്നു. കുടുംബത്തിന് അവകാശപ്പെട്ട 12 ഏക്കര്‍ ഭൂമി കാടുകയറി നശിക്കുകയാണ്.
ഇതിനെല്ലാം ഉത്തരവാദികളായ വനം ഉദ്യോഗസ്ഥരും ജനപ്രതിനിധികളും കാഞ്ഞിരത്തിനാല്‍ കുടുംബത്തിന്റെ നഷ്ടം നികത്താന്‍ ബാധ്യസ്തരാണ്. അതിനവര്‍ തയാറാവണം.
നികത്താനാവാത്ത നഷ്ടങ്ങളാണ് ഈ കുടംബത്തിന് സംഭവിച്ചത്. കോര്‍പറേറ്റ് മുതലാളിമാരുടെയും ഭൂപ്രഭുക്കളുടെയും തോട്ടങ്ങള്‍ പലതും വനഭൂമിയില്‍ അനധികൃതമായി നിലകൊള്ളുമ്പോഴും ഒരു ചെറുവിരല്‍ പോലുമനക്കാതെ അവരുടെ പാദസേവകരായി പണംപ്പറ്റി
കഴിയുന്ന അധികാരികളുടെയും ഭരണവര്‍ഗ, രഷ്ട്രീയ പാര്‍ട്ടികളുടെയും ഇരട്ട മുഖമാണ് ഈ കുടംബത്തോട് കാണിക്കുന്ന അനീതി വെളിപ്പെടുത്തുന്നത്. തട്ടിയെടുക്കപ്പെട്ട ഭൂമിയോടൊപ്പം മാന്യമായ നഷ്ടപരിഹാരത്തിനുകൂടി കുടുംബത്തിന് അവകാശമുണ്ട്. നീതിക്കായുള്ള അവരുടെ പോരാട്ടം ന്യായമാണെന്നും ബുള്ളറ്റിനില്‍ പറയുന്നു. സംഭവത്തില്‍ പൊലിസ് അന്വേഷണം ആരംഭിച്ചിട്ടുണ്ട്.