തിരുവനന്തപുരം: എക്‌സൈസ് വകുപ്പ് സി.പി.എമ്മിന്റെ ധനസമാഹരണ കേന്ദ്രമായി മാറിയെന്നും സര്‍ക്കാരിലെ തീവെട്ടിക്കൊള്ള വകുപ്പായി എക്‌സൈസ് വകുപ്പ് മാറിയിരിക്കുകയാണെന്നും പ്രതിപക്ഷ നേതാവ് രമേശ് ചെന്നിത്തല.
ബിവറേജസ് കോര്‍പ്പറേഷനില്‍ മദ്യം വാങ്ങുന്നതിലെ അഴിമതി സംബന്ധിച്ച കൂടുതല്‍ കാര്യങ്ങള്‍ വരും ദിവസങ്ങളില്‍ പുറത്തുവരുമെന്നും അദ്ദേഹം പറഞ്ഞു.
നില്‍ക്കകള്ളിയില്ലാതെയാണ് ബ്രൂവറികള്‍ക്കും ഡിസ്റ്റ്‌ലറിക്കുമുള്ള അനുമതി സര്‍ക്കാര്‍ പിന്‍വലിച്ചത്. ഉന്നതതല അഴിമതിയുടെ ഭാഗമായാണ് ഉത്തരവുകള്‍ ഇറങ്ങിയത്. സ്വന്തക്കാരെയും ഇഷ്ടക്കാരെയും വിളിച്ചു നടത്തിയ ഇടപാടില്‍ മുഖ്യമന്ത്രിയുടേയും എക്‌സൈസ് മന്ത്രിയുടേയും ഇടപെടലാണ് വ്യക്തമാകുന്നത്. വലിയ ക്രമക്കേടാണ് ഇക്കാര്യത്തില്‍ നടത്തിയത്. തട്ടിക്കൂട്ട് കമ്പനികള്‍ക്ക് അനുമതി കൊടുക്കുന്നതിനുമുന്‍പ് എന്തുകൊണ്ട് അന്വേഷിച്ചില്ലെന്നത് നിഗൂഡമാണ്.
താന്‍ ഉന്നയിച്ച 10 ചോദ്യങ്ങള്‍ക്ക് സര്‍ക്കാരിന് ഇതുവരെ മറുപടി നല്‍കാനായിട്ടില്ലെന്നും വലിയ അന്വേഷണത്തിലൂടെ മാത്രമേ ഇക്കാര്യങ്ങള്‍ വെളിപ്പെടൂവെന്നും ചെന്നിത്തല പറഞ്ഞു.