ചെന്നൈ: തമിഴ്‌നാട്ടില്‍ പത്താം ക്ലാസ് വിദ്യാര്‍ഥിയെ സഹപാഠി കത്രിക കൊണ്ട് കുത്തിക്കൊന്നു. കൊടൈക്കനാലിലെ ഭാരതീയ വിദ്യാഭവന്‍സ് ഗാന്ധി വിദ്യാശ്രം സ്‌കൂള്‍ വിദ്യാര്‍ഥിയും കൃഷ്ണഗിരി ഹൊസൂര്‍ സ്വദേശിയുമായ കപില്‍ രാഘവേന്ദ്ര (16) ആണ് മരിച്ചത്. ഹോസ്റ്റലില്‍ ഭക്ഷണം കഴിക്കുന്നതിനിടെയുണ്ടായ വാക്കുതര്‍ക്കമാണ് ആക്രമണത്തില്‍ കലാശിച്ചതെന്ന് പൊലിസ് പറഞ്ഞു. കത്രിക കൊണ്ടു കുത്തിയ ശേഷം വിദ്യാര്‍ഥിയെ ക്രിക്കറ്റ് സ്റ്റംപ് ഉപയോഗിച്ച് തല്ലിയതായും റിപ്പോര്‍ട്ടുണ്ട്. കപിലിനെ സമീപമുള്ള സ്വകാര്യ ആശുപ്രതിയില്‍ എത്തിച്ചെങ്കിലും രക്ഷിക്കാനായില്ല. പ്രതി വിരുദനഗര്‍ സ്വദേശി ശ്രീ ഹരീഷിനെ സേലത്തെ ജുവനൈല്‍ ഹോമിലേക്കു മാറ്റി. ഹരീഷ് നേരത്തെ രണ്ടുതവണ അച്ചടക്ക നടപടിക്കു വിധേയനായിട്ടുണ്ടെന്ന് സ്‌കൂള്‍ അധികൃതര്‍ അറിയിച്ചു.