ദുബൈ: പാകിസ്താനെതിരായ ടെസ്റ്റ് ക്രിക്കറ്റില്‍ ആസ്‌ത്രേലിയക്ക് ബാറ്റിങ് തകര്‍ച്ച. പാകിസ്താന്റെ ഒന്നാമിന്നിങ്‌സ് സ്‌കോറായ 482 റണ്‍സ് പിന്തുടര്‍ന്ന ആസ്‌ത്രേലിയക്ക് 202 റണ്‍സെടുക്കാനെ കഴിഞ്ഞുള്ളൂ. മികച്ച ബൗളിങ് പ്രകടനം കാഴ്ചവച്ച അരങ്ങേറ്റക്കാരന്‍ ബിലാല്‍ ആസിഫും മുഹമ്മദ് അബ്ബാസുമാണ് ആസ്‌ത്രേലിയന്‍ ബാറ്റിങ് നിരയുടെ അടിവേരറുത്തത്. ബിലാല്‍ ആറ് വിക്കറ്റും അബ്ബാസ് നാല് വിക്കറ്റും നേടി.
ഓസിസ് ടീമിന് മികച്ച തുടക്കം ലഭിച്ചെങ്കിലും പിടിച്ച് നില്‍ക്കാനായില്ല. വിക്കറ്റ് നഷ്ടം കൂടാതെ 142 എന്ന നിലയില്‍നിന്നാണ് ഓസിസ് തകര്‍ന്നടിഞ്ഞത്. ഓപ്പണര്‍ ഉസ്മാന്‍ ഖവാജയും(85) ആരോണ്‍ ഫിഞ്ചും (62) മാത്രമാണ് ഭേദപ്പെട്ട പ്രകടനം നടത്തിയത്. ഇരുവരും പുറത്തായതിന് ശേഷം ആസ്‌ത്രേലിയ തുടരെ തുടരെ വിക്കറ്റ് നഷ്ടപ്പെടുത്തുകയായിരുന്നു.
മിച്ചല്‍ മാര്‍ഷ് (12), പീറ്റര്‍ സിഡില്‍ (10) എന്നിവരാണ് ആസ്‌ത്രേലിയന്‍ നിരയില്‍ രണ്ടക്കം കടന്ന മറ്റുള്ളവര്‍. ആസ്‌ത്രേലിയയെ 202 റണ്‍സില്‍ പുറത്താക്കി മൂന്നാം ദിനം ബാറ്റിങ് തുടര്‍ന്ന പാകിസ്താന്‍ കളി അവസാനിക്കുമ്പോള്‍ മൂന്ന് വിക്കറ്റ് നഷ്ടത്തില്‍ 45 റണ്‍സാണ് നേടിയത്. 325 റണ്‍സിന്റെ ലീഡിലാണ് പാകിസ്താന്‍.
23 റണ്‍സുമായി ഇമാമുല്‍ ഹഖാണ് ക്രീസിലുള്ളത്. മുഹമ്മദ് ഹഫീസ് (17), ബിലാല്‍ ആസിഫ് (0), അസ്ഹര്‍ അലി (4) എന്നിവരുടെ വിക്കറ്റുകളാണ് പാകിസ്താന് നഷ്ടമായത്. ആസ്‌ത്രേലിയക്ക് വേണ്ടി ജോണ്‍ ഹോളണ്ട് രണ്ടും നഥാന്‍ ലിയോണ്‍ ഒന്നും വിക്കറ്റ് നേടി.