മോസ്‌കോ: ഔദ്യോഗിക സന്ദര്‍ശനത്തിനായി പ്രധാനമന്ത്രി നരേന്ദ്ര മോദി മോസ്‌കോയിലെത്തി. ചതുര്‍രാഷ്ട്ര സന്ദര്‍ശനത്തിന്റെ ഭാഗമായി ജര്‍മനിയും സ്‌പെയിനും സന്ദര്‍ശിച്ച ശേഷമാണ് മോദി റഷ്യയിലെത്തിയത്.
രïു ദിവസത്തെ സന്ദര്‍ശനമാണ് മോദി റഷ്യയില്‍ നടത്തുന്നത്. ഇന്ന് റഷ്യന്‍ പ്രസിഡന്റ് വ്‌ളാദ്മിര്‍ പുടിനുമൊത്ത് 18ാമത് ഇന്തോ-റഷ്യാ വാര്‍ഷിക ഉച്ചകോടിയില്‍ പങ്കെടുക്കും. സെന്റ് പീറ്റേഴ്‌സ്ബര്‍ഗില്‍ നടക്കുന്ന ഇന്റര്‍നാഷനല്‍ എക്‌ണോമിക് ഫോറത്തിലും മോദി സംസാരിക്കും.
റഷ്യന്‍ സന്ദര്‍ശനത്തിന്റെ ഭാഗമായി കഴിഞ്ഞ ദിവസം പ്രാദേശിക പത്രമായ 'റോസിയ്‌സ്‌കായ ഗസെറ്റ'യില്‍ പ്രധാനമന്ത്രിയുടെ ലേഖനം പ്രസിദ്ധീകരിച്ചിരുന്നു. ഭീകരവിരുദ്ധ പോരാട്ടത്തില്‍ ഇരുരാഷ്ട്രങ്ങളും സ്വാഭാവിക പങ്കാളികളാണെന്ന് മോദി ലേഖനത്തില്‍ വ്യക്തമാക്കി. അതേസമയം, ആണവരംഗത്ത് കൂടുതല്‍ സഹകരണം ലക്ഷ്യമിട്ട് മോദിയും പുടിനും തമ്മില്‍ കരാറില്‍ ഒപ്പുവയ്ക്കുമെന്ന് ഇന്ത്യയുടെ റഷ്യന്‍ അംബാസഡര്‍ പങ്കജ് സാറന്‍ അറിയിച്ചു. കൂടങ്കുളത്ത് അഞ്ച്, ആറ് പ്ലാന്റുകള്‍ തുടങ്ങുന്നതിനെ കുറിച്ച് കൂടിക്കാഴ്ചയില്‍ ചര്‍ച്ച ചെയ്യുമെന്നും അദ്ദേഹം അറിയിച്ചു.
ഇന്നലെ റഷ്യയിലെത്തിയ മോദി നാളെ ഫ്രഞ്ച് സന്ദര്‍ശനത്തിനായി പാരിസിലേക്ക് തിരിക്കും. പുതിയ ഫ്രഞ്ച് പ്രസിഡന്റ് ഇമ്മാനുവല്‍ മാക്രോണുമായി കൂടിക്കാഴ്ച നടത്തും.