ദമാം: സഊദിയിലെ കിഴക്കന്‍ പ്രവശ്യയില്‍ ശക്തമായ പൊടിക്കാറ്റു മൂലം ജനജീവിതം ദുസ്സഹമായി. പല റോഡുകളിലും ഗതാഗതം മണിക്കൂറികളോളം മുടങ്ങിയതിനാല്‍ യാത്രക്കാരാണ് ഏറ്റവും കൂടുതല്‍ ദുരിതത്തിലായത്.

അടുത്ത മൂന്നു ദിവസവും ഇതേ അവസ്ഥ തുടരാന്‍ സാധ്യതയുള്ളതിനാല്‍ ദൂരയാത്ര ഒഴിവാക്കാന്‍ പരമാവധി ശ്രമിക്കണമെന്ന് സിവില്‍ ഡിഫന്‍സ് മുന്നറിയിപ്പു നല്‍കിയിട്ടുണ്ട്.

ചൊവ്വാഴ്ച വൈകുന്നേരത്തോടെ ആരംഭിച്ച കാറ്റ് ഇന്നലെയാണ് തീവ്രഭാവം പൂണ്ടത്. മിനിറ്റില്‍ 40 കിലോമീറ്റര്‍ വേഗത്തില്‍ വീശുന്ന കാറ്റുമൂലം അല്‍ അഹ്‌സ, ജുബൈല്‍, കിംഗ് ഫഹദ് എയര്‍പോര്‍ട്ട്, ഖഫ്ജി, ഹഫര്‍ അല്‍ ബാത്തിന്‍, നാരിയ, സഫ് വ എന്നീ ഭാഗത്തേക്കുള്ള റോഡുകള്‍ മണലുകൊണ്ട് മൂടപ്പെട്ട അവസ്ഥയിലാണ്.

ദമാം കിംഗ് ഫഹദ് വിമാനത്താവളത്തിലേക്കുള്ള റോഡില്‍ രാവിലെ നാലു മണിക്കൂറോളം പൂര്‍ണമായും ഗതാഗതം സംതംഭിച്ചു. ജെ.സി.ബി ഉപയോഗിച്ച് മണല്‍ നീക്കി സഞ്ചാര യോഗ്യമാക്കുകയായിരുന്നു. ഖഫ്ജി റോഡില്‍ ദൂരക്കാഴ്ച ഇല്ലാത്തതു മൂലം അഞ്ചു വ്യത്യസ്ത അപകടങ്ങള്‍ ഉണ്ടായതായി റെഡ് ക്രസന്റ് അറിയിച്ചു. പല റോഡുകളിലും വൈദുത പോസ്റ്റുകളും പരസ്യ ബോര്‍ഡുകളും വീണതിനാല്‍ ഗതാഗതം സ്തംഭിച്ചു.

ദമാം വിമാനത്താവളത്തിലേക്കുള്ള പല വിമാന സര്‍വിസുകളും താളംതെറ്റുകയും അടുത്തുള്ള വിമാനത്താവളങ്ങളിലേക്ക് തിരിച്ചു വിടുകയും ചെയ്തു. അടുത്ത രണ്ടു ദിവസം കൂടി കാറ്റ് തുടരുമെന്നാണ് അറിയുന്നത്.