തൃക്കരിപ്പൂര്‍: അന്താരാഷ്ട്ര ഇരട്ടദിനാചരണത്തിന്റെ ഭാഗമായി തൃക്കരിപ്പൂര്‍ സെന്റ് പോള്‍സ് എ.എല്‍.പി സ്‌കൂള്‍ സ്‌കൂളില്‍ ഇന്നലെ ഇരട്ടകളുടെ സംഗമം സംഘടിപ്പിച്ചു. ഒന്നു മുതല്‍ ഏഴുവരെയുള്ള വിവിധ ക്‌ളാസുകളില്‍ പഠിക്കുന്ന 19 ജോഡി ഇരട്ടകളും അവരുടെ കുടുംബാംഗങ്ങളുമാണ് ഇന്നലെ സ്‌കൂള്‍ മുറ്റത്ത് ഒത്തുചേര്‍ന്നത്.
സംഗമത്തില്‍ ഇരട്ടക്കുട്ടികളെ അസംബ്ലിയില്‍ പ്രത്യേകമായി അണിനിരത്തി ആദരിച്ചു. ഒന്നാംക്ലാസില്‍ ഇവിടെ മൂന്നുജോഡി ഇരട്ടക്കുട്ടികളുണ്ട്. ദിനാചരണത്തിന്റെ ഭാഗമായി ഓരോ ഇരട്ടക്കുട്ടിയും ഒരേതരത്തിലും നിറത്തിലുമുള്ള വസ്ത്രം ധരിച്ചാണ് എത്തിയത്. 1400 കുട്ടികള്‍ പഠിക്കുന്ന സ്‌കൂളില്‍ ഇത്തവണയാണ് ഏറ്റവും കൂടുതല്‍ ഇരട്ടക്കുട്ടികള്‍ പഠിക്കുന്നത്. ചടങ്ങില്‍ പങ്കെടുത്ത കുട്ടികള്‍ക്ക് ഫോട്ടോ പതിച്ച കലണ്ടറും മധുരവും പൂക്കളും വിതരണം ചെയ്തു.