ന്യൂഡല്‍ഹി: 35 എ, 370 എന്നിവ എടുത്തു കളയില്ലെന്ന ഗവര്‍ണറുടെ ഉറപ്പില്‍ വിശ്വാസം വരാതെ കശ്മിരിലെ രാഷ്ട്രീയപ്പാര്‍ട്ടികള്‍. കശ്മിര്‍ കാര്യത്തില്‍ ഗവര്‍ണര്‍ അന്തിമവാക്കല്ലെന്നും ഇക്കാര്യത്തിലെ തീരുമാനം പറയേണ്ടത് കേന്ദ്രസര്‍ക്കാരാണെന്നും നാഷനല്‍ കോണ്‍ഫറന്‍സ് നേതാവ് ഉമര്‍ അബ്ദുല്ല പറഞ്ഞു.
കശ്മിരിലെ അധിക സൈനിക വിന്യാസത്തിന് പിന്നാലെ വ്യാപകമായ അഭ്യൂഹങ്ങള്‍ പരന്നതിനെത്തുടര്‍ന്നാണ് ഉമര്‍ അബ്ദുല്ലയുടെ നേതൃത്വത്തിലുള്ള പ്രതിനിധി സംഘം കശ്മിര്‍ ഗവര്‍ണര്‍ സത്യപാല്‍ മല്ലികിനെ കണ്ടത്. 35 എ എടുത്തു കളയുന്നത് സംബന്ധിച്ച അറിയിപ്പൊന്നും ലഭിച്ചില്ലെന്ന് പ്രതിനിധി സംഘത്തെ അറിയിച്ച ഗവര്‍ണര്‍ ഇക്കാര്യത്തില്‍ ഔദ്യോഗിക പ്രസ്താവന നടത്തുകയും ചെയ്തു.
സുരക്ഷാ കാരണങ്ങള്‍ മുന്‍ നിര്‍ത്തിയാണ് അധിക വിന്യാസമെന്നും അമര്‍നാഥ് യാത്രികര്‍ക്കും ടൂറിസ്റ്റുകള്‍ക്കും വൈകാതെ മടങ്ങിയെത്താന്‍ കഴിയുമെന്നുമാണ് ഗവര്‍ണറുടെ വിശദീകരണം. എന്നാല്‍, ജനങ്ങളുടെ ഭീതിയകറ്റേണ്ടത് കേന്ദ്രസര്‍ക്കാരിന്റെ ബാധ്യതയാണെന്ന് ഉമര്‍ അബ്ദുല്ല പറഞ്ഞു. ഇക്കാര്യത്തില്‍ നാളെ പാര്‍ലമെന്റില്‍ ഉറപ്പുപറയാന്‍ കേന്ദ്രസര്‍ക്കാര്‍ തയാറാവണമെന്നും ഉമര്‍ അബ്ദുല്ല ആവശ്യപ്പെട്ടു. കശ്മിരില്‍ കേന്ദ്രസര്‍ക്കാര്‍ അനാവശ്യ ഭീതി പരത്തുകയാണെന്ന് മുന്‍ കേന്ദ്രമന്ത്രിയും കോണ്‍ഗ്രസ് നേതാവുമായ സൈഫുദ്ദീന്‍ സോസ് പറഞ്ഞു. അമര്‍നാഥ് യാത്ര നിര്‍ത്തിവച്ചതും ടൂറിസ്റ്റുകളോട് മടങ്ങാന്‍ ആവശ്യപ്പെടുന്നതുമൊന്നും സാധാരണ നടപടികളല്ല. ഇതെല്ലാം ജനങ്ങള്‍ക്ക് പേടിയുണ്ടാക്കിയിട്ടുണ്ട്. ഇത് പരിഹരിക്കാന്‍ കേന്ദ്രസര്‍ക്കാര്‍ തന്നെയാണ് തയാറാകേണ്ടതെന്നും സോസ് പറഞ്ഞു.
കശ്മിലെ സാഹചര്യം സംബന്ധിച്ച് കേന്ദ്രസര്‍ക്കാര്‍ എന്തുകൊണ്ടാണ് മൗനം പാലിക്കുന്നതെന്ന് പി.ഡി.പി നേതാവ് മെഹ്ബൂബ മുഫ്തി ചോദിച്ചു. എന്തിനാണ് ശ്രീനഗര്‍ എന്‍.ഐ.ടിയിലെ വിദ്യാര്‍ഥികളോട് പോകാന്‍ ആവശ്യപ്പെട്ടത്.
എന്തിനാണ് ടൂറിസ്റ്റുകളോട് കശ്മിര്‍ വിടാന്‍ പറയുന്നത്. എന്തിനാണ് അധിക സൈനിക വിന്യാസം നടത്തിയത്. എന്തിനാണ് എയര്‍ഫോഴ്‌സിനോടും സൈന്യത്തോടും ജാഗ്രത പുലര്‍ത്താന്‍ നിര്‍ദേശിച്ചത്. കശ്മിരില്‍ കേന്ദ്രം അരക്ഷിതാവസ്ഥ പടര്‍ത്തുകയാണ്. ജനാധിപത്യത്തെയും മനുഷ്യത്വത്തെയും കുറിച്ചു പറയുന്നവര്‍ എന്തുകൊണ്ട് ജനങ്ങളുടെ ഭീതി ലഘൂകരിക്കാന്‍ ശ്രമിക്കുന്നില്ലെന്നും മെഹ്ബൂബ മുഫ്തി ചോദിച്ചു.