മാഞ്ചസ്റ്റര്‍: രണ്ട് ദിവസം മുന്‍പ് ഫിഫ മികച്ച താരങ്ങളുടെ 10 പേരടങ്ങുന്ന പട്ടിക പ്രഖ്യാപിച്ചതു മുതല്‍ മാഞ്ചസ്റ്റര്‍ സിറ്റി പരിശീലകന്‍ പെപ് ഗ്വാര്‍ഡിയോള കലിപ്പിലാണ്. സിറ്റിയിലെ തന്റെ മികച്ച താരങ്ങളില്‍ ഒരാളെപ്പോലും ഉള്‍പ്പെടുത്തിയില്ല എന്നതാണ് പരിശീലകന്റെ മുഖമാറ്റത്തിന് കാരണം. ഗോള്‍കീപ്പര്‍ അലിസന്‍ ബെക്കര്‍, വിങ്ങര്‍ ബെര്‍ണാഡോ സില്‍വ എന്നിവരെയെങ്കിലും ലിസ്റ്റില്‍ ഉള്‍പ്പെടുത്താമായിരുന്നു എന്നതാണ് കോച്ചിന്റെ മറുപടി. നേരത്തേ ഇവരെ പട്ടികയില്‍ ഉള്‍പ്പെടുത്താതിരുന്നതോടെ ഫുട്‌ബോള്‍ ആരാധകരും നിരീക്ഷകരും രംഗത്തെത്തിയിരുന്നു.
ഇംഗ്ലീഷ് പ്രീമിയര്‍ ലീഗ്, എഫ്.എ കപ്പ്, ലീഗ് കപ്പ് എന്നിവ സ്വന്തമാക്കിയാണ് സിറ്റി കഴിഞ്ഞ സീസണ്‍ ഗംഭീരമാക്കിയത്്. എന്നിട്ടും ഫിഫ പട്ടികയില്‍ ക്ലബിലെ ഒരു താരം പോലും ഇടം പിടിച്ചിട്ടില്ല. ഈ സാഹചര്യത്തിലാണ് പെപ് ക്ഷുഭിതനായത്.
ബെര്‍ണാഡോ സില്‍വയേക്കാള്‍ മികച്ച ഒരു സീസണ്‍ അവകാശപ്പെടാനുള്ള മറ്റൊരു കളിക്കാരനില്ലെന്നാണ് എനിക്ക് തോന്നുന്നത്. യുവേഫ നാഷന്‍സ് ലീഗ് കിരീടവും സില്‍വയ്ക്ക് ലഭിച്ചു. എന്നിട്ടും ഫിഫ പട്ടികയില്‍ ഇടം കൊടുത്തില്ല- പെപ് പൊട്ടിത്തെറിച്ചു.
ചാംപ്യന്‍സ് ലീഗില്‍ മികവ് കാണിക്കുന്നവര്‍ക്കാണ് ഈ പുരസ്‌കാരങ്ങളൊക്കെ. ഞങ്ങള്‍ മറ്റെല്ലാ പോരാട്ടങ്ങളിലും കിരീടം ചൂടി, അത് അവര്‍ കണക്കിലെടുത്തില്ല- പെപ് കുറ്റപ്പെടുത്തി.