തിരുവനന്തപുരം: കഠിനകുളം ഗവ. എല്‍.പി സ്‌കൂളിന്റെ വികസനത്തിന്  പങ്കാളിത്തം വഹിച്ച്   ടെക്‌നോപാര്‍ക്ക് കമ്പനിയായ ക്വസ്റ്റ് ഗ്ലോബല്‍. കമ്പനിയുടെ കോര്‍പറേറ്റ് സോഷ്യല്‍ ഉത്തരവാദിത്വത്തിന്റെ ഭാഗമായാണ് സ്‌കൂളിന്റെ വികസനത്തിനായി സ ഹകരിച്ചത്. സ്‌കൂള്‍ നവീകരണം, കുട്ടികളുടെ പാര്‍ക്ക് നിര്‍മാണം, മറ്റ് അറ്റകുറ്റ പണികള്‍ എന്നിവ കമ്പനി  മുന്‍കൈയെടുത്ത് ചെയ്തു. കംപ്യൂട്ടറുകളും  അനുബന്ധ ഉപകരണങ്ങളും  വാങ്ങിനല്‍കുകയും ചെയ്തു. ഇന്നലെ പ്രവേശനോത്സവത്തോടനുബന്ധിച്ച് നവീകരിച്ച സ്‌കൂള്‍ കെട്ടിടത്തിന്റെയും കുട്ടികളുടെ പാര്‍ക്കിന്റെയും  ഉദ്ഘാടനം ക്വസ്റ്റ് ഗ്ലോബലിന്റെ ഗ്ലോബല്‍ ഡെലിവറി വിഭാഗം അസോസിയേറ്റ് വൈസ് പ്രസിഡന്റ് കെ.വി ശങ്കരനാരായണന്‍ നിര്‍വഹിച്ചു. സഹകരണം തുടര്‍ന്നും ഉണ്ടാകുമെന്ന് അദ്ദേഹം പറഞ്ഞു.
ഉപജില്ലാ വിദ്യാഭ്യാസ ഓഫിസര്‍ കെ.മോഹനകുമാര്‍, ഹെഡ്മിസ്ട്രസ് എസ്.ഷീലാകുമാരി, വാര്‍ഡ് മെമ്പര്‍ ഷമി, ക്വസ്റ്റ് ഗ്ലോബല്‍ പ്രതിനിധികളായ രശ്മി സ്റ്റീഫന്‍, രാജേഷ് കുമാര്‍.പി, കഠിനംകുളം സെന്റ് മൈക്കിള്‍സ് സ്‌കൂള്‍ മാനേജര്‍ ഫാ.സജു റോള്‍ഡന്‍ തുടങ്ങിയവര്‍ സംസാരിച്ചു.