കണ്ണൂര്‍: കണ്ണൂര്‍ സിറ്റി ആദികടലായിയിലെ അബ്ദുല്‍ റഊഫ് എന്ന കട്ട റഊഫിനെ വെട്ടിക്കൊലപ്പെടുത്തിയ സംഭവത്തില്‍ എസ്.ഡി.പി.ഐ പ്രാദേശിക നേതാവിനെ അറസ്റ്റു ചെയ്തു. തയ്യില്‍ കുറുവ റോഡ് ഹസ്രത്ത് നിസാമുദ്ദീന്‍ (24) ആണ് പിടിയിലായത്.

ഡിവൈ.എസ.്പി പി.പി സദാനന്ദന്‍, കണ്ണൂര്‍ സിറ്റി സി.ഐ പി.ആര്‍ സതീശന്‍ എന്നിവരുടെ നേതൃത്വത്തിലുള്ള പൊലിസ് സംഘം തലശ്ശേരി റെയില്‍വേ സ്റ്റേഷനില്‍ വച്ചാണ് പ്രതിയെ പിടികൂടിയത്. ഇയാള്‍ എ.ബി.വി.പി പ്രവര്‍ത്തകനായിരുന്ന പള്ളിക്കുന്നിലെ സച്ചിന്‍ ഗോപാലിനെ കൊലപ്പെടുത്തിയ കേസിലും കൊല്ലപ്പെട്ട റഊഫിനെ 2015 ല്‍ കസാനക്കോട്ടയില്‍ വച്ച് കുത്തിപ്പരുക്കേല്‍പ്പിച്ച കേസിലും പ്രതിയാണെന്നു പൊലിസ് പറഞ്ഞു. കൊലപാതകവുമായി ബന്ധപ്പെട്ട് ഒരാളെ കൂടി പൊലിസ് കസ്റ്റഡിയിലെടുത്തിട്ടുണ്ട്.

എസ്.ഡി.പി.ഐ പ്രവര്‍ത്തകനായ കണ്ണൂര്‍ സിറ്റിയിലെ ഫാറൂഖിനെ രണ്ടുവര്‍ഷം മുന്‍പ് കൊലപ്പെടുത്തിയ വിരോധവും റഊഫ് തിരികെ ആക്രമിക്കുമോ എന്നുള്ള ഭയവുമാണ് കൊലയ്ക്കു പിന്നിലെന്നു പൊലിസ് പറഞ്ഞു. കഴിഞ്ഞ 29 നു രാത്രിയാണ് ആദികടലായി ക്ഷേത്രത്തിനു പിന്നിലെ റോഡില്‍ ബൈക്ക് തടഞ്ഞു നിര്‍ത്തി റഊഫിനെ വെട്ടിക്കൊലപ്പെടുത്തിയത്.