കേപ്ടൗണ്‍: അന്താരാഷ്ട്ര ക്രിക്കറ്റില്‍നിന്ന് വിരമിച്ചതിന് പുറമേ എല്ലാതരം ക്രിക്കറ്റില്‍നിന്നും വിരമിക്കല്‍ പ്രഖ്യാപിച്ച് മുന്‍ ന്യൂസിലന്‍ഡ് ക്രിക്കറ്റ് താരം ബ്രെണ്ടന്‍ മെക്കല്ലം. ഫ്രാഞ്ചൈസി ക്രിക്കറ്റില്‍ സജീവമായിരുന്ന മെക്കല്ലം നടന്നുകൊണ്ടിരിക്കുന്ന കാനഡ ടി20 ഗ്ലോബല്‍ ചാംപ്യന്‍ഷിപ്പിന്റെ അവസാനം വിരമിക്കുമെന്ന് പ്രഖ്യാപിച്ചു.
ഈ ടൂര്‍ണമെന്റും കഴിഞ്ഞ് യൂറോ ടി20 സ്ലാം ചാംപ്യന്‍ഷിപ്പിനൊടുവില്‍ വിരമിക്കുമെന്ന് താരം നേരത്തേ അറിയിച്ചിരുന്നെങ്കിലും പിന്നീട് തീരുമാനം മാറ്റുകയായിരുന്നു. മോണ്‍ട്രിയല്‍ ടൈഗേഴ്‌സിനെതിരേ ടൊറന്റോ നാഷനല്‍സിന്റെ അവസാന മത്സരത്തിന് ശേഷമാണ് താരം ഈ തീരുമാനം പുറത്തുവിട്ടത്.
2016ല്‍ അന്താരാഷ്ട്ര ക്രിക്കറ്റില്‍നിന്ന് വിരമിച്ച മെക്കല്ലം കഴിഞ്ഞ ഫെബ്രുവരിയില്‍ ബിഗ് ബാഷില്‍ നിന്ന് വിരമിക്കാന്‍ തീരുമാനിച്ചിരുന്നു. താന്‍ ഇനി പരിശീലനറോളുകളിലേക്ക് പതിയെ മാറാനുള്ള ശ്രമത്തിലാണെന്ന് അന്ന് മെക്കല്ലം സൂചിപ്പിച്ചിരുന്നു. 370 ടി20 മത്സരങ്ങളില്‍നിന്നായി 9,922 റണ്‍സാണ് താരത്തിന്റെ സമ്പാദ്യം.
ന്യൂസിലന്‍ഡിന് വേണ്ടി 101 ടെസ്റ്റും 260 ഏകദിനങ്ങളും 71 ടി20 അന്താരാഷ്ട്ര മത്സരങ്ങളും താരം കളിച്ചിട്ടുണ്ട്.