കൊണ്ടോട്ടി:ദേശീയ നൈപുണി വികസന മന്ത്രാലയവും കേന്ദ്രസര്‍ക്കാരും ചേര്‍ന്ന് നടത്തിയ ഇന്ത്യ സ്‌കില്‍സ് മേളയില്‍ വെള്ളി മെഡല്‍ നേടി മുഹമ്മദ് റാബിത്ത് കുന്നംപള്ളി നാടിന് അഭിമാനമായി. വാള്‍ ആന്‍ഡ് ഫ്‌ലോര്‍ ടൈലിങ് വിഭാഗത്തില്‍ മെഡല്‍ നേടിയ മുഹമ്മദ് റാബിത്ത് ഒരു ലക്ഷം രൂപയുടെ കാഷ് പ്രൈസും അടുത്തവര്‍ഷം റഷ്യയിലെ കസാനില്‍ നടക്കുന്ന അന്തര്‍ദേശീയ സ്‌കില്‍ മേളയില്‍ ഇന്ത്യയെ പ്രതിനീധീകരിച്ച് പങ്കെടുക്കാനുള്ള യോഗ്യതയും സ്വന്തമാക്കി.
അരീക്കോട് ഗവ. ഐ.ടി.ഐ ഇലക്ട്രോണിക്‌സ് വിദ്യാര്‍ഥിയായ മുഹമ്മദ് റാബിത്തിന് പരിശീലനത്തിനത്തിനും സാമഗ്രികള്‍ക്കും സൗകര്യമൊരുക്കിയത് പ്രിന്‍സിപ്പല്‍ രവികുമാരും അധ്യാപകന്‍ ഹമീദ് ഇബ്രാഹീമുമാണ്. സ്‌കൂള്‍ പഠനകാലത്ത് പ്രവൃത്തി പരിചയമേളയില്‍ തുടര്‍ച്ചയായി മൂന്നുതവണ കയര്‍ ഡോര്‍മേറ്റ് വിഭാഗത്തില്‍ എ. ഗ്രേഡ് നേടിയിരുന്നു. സംസ്ഥാന സര്‍ക്കാര്‍ ഐ.ടി.ഐ വിദ്യാര്‍ഥികള്‍ക്കായി സിംഗപ്പൂര്‍ ഐ.ടി.ഐയുമായി സഹകരിച്ച് നടത്തുന്ന പഠന സാങ്കേതിക സൗകര്യ പരിപാടിയിലേക്ക് യോഗ്യത നേടിയിട്ടുണ്ട്.
കൊണ്ടോട്ടി മേലങ്ങാടി കുന്നംപള്ളി അബ്ദുല്‍ അസീസിന്റെയും ഷഹര്‍ബാനിന്റെയും മകനാണ്. അന്തര്‍ദേശീയ മത്സരത്തിനുള്ള കേന്ദ്രസര്‍ക്കാരിന്റെ എട്ടുമാസത്തെ പരിശീലന ക്യാംപിലേക്ക് പോകാനൊരുങ്ങുകയാണ് മുഹമ്മദ് റാബിത്ത്.