വാഷിങ്ടണ്‍: മുതിര്‍ന്ന മാധ്യമപ്രവര്‍ത്തകനും വാഷിങ്ടണ്‍ പോസ്റ്റ് കോളമിസ്റ്റുമായ ജമാല്‍ കഷോഗിയുടെ തിരോധാനത്തില്‍ പ്രതികരണവുമായി യു.എന്‍. കഷോഗിയെ കാണാതായ സംഭവത്തില്‍ സത്യം പുറത്തുവരണമെന്നു യു.എന്‍ സെക്രട്ടറി ജനറല്‍ അന്റോണിയോ ഗുട്ടറസ് പറഞ്ഞു.
കഷോഗിയുടെ തിരോധാനത്തില്‍ നടുക്കം രേഖപ്പെടുത്തിയ അദ്ദേഹം, സംഭവത്തിനു പിന്നില്‍ ആരെന്നും എന്താണുണ്ടായതെന്നുമുള്ള സത്യം പുറത്തുവരണമെന്നും പറഞ്ഞു. ലോകത്ത് ഇത്തരം സംഭവങ്ങള്‍ വര്‍ധിച്ചുവരുന്നതായി വ്യക്തമാക്കിയ യു.എന്‍ സെക്രട്ടറി ജനറല്‍, ഇത്തരം കാര്യങ്ങളില്‍ ജനങ്ങള്‍ ബോധവാന്‍മാരാകണമെന്നും പറഞ്ഞു. അതേസമയം, വിഷയത്തില്‍ തങ്ങള്‍ക്കെതിരായി ഉയരുന്ന ആരോപണങ്ങള്‍ സഊദി തള്ളി. അത്തം ആരോപണങ്ങള്‍ അടിസ്ഥാനരഹിതമാണെന്നും വിഷയത്തില്‍ അന്വേഷണം പുരോഗമിക്കുകയാണെന്നും സഊദി ആഭ്യന്തര മന്ത്രി അബ്ദുല്‍ അസീസ് ബിന്‍ സഊദ് രാജകുമാരന്‍ പറഞ്ഞു. ഇസ്താംബുളിലെ സഊദി കോണ്‍സുലേറ്റിനകത്തുവച്ചു കഷോഗിയെ മര്‍ദിച്ചു കൊലപ്പെടുത്തുന്നതിന്റെ ദൃശ്യങ്ങള്‍ തുര്‍ക്കി അധികൃതര്‍ക്കു ലഭിച്ചതായി നേരത്തെ റിപ്പോര്‍ട്ടുണ്ടായിരുന്നു. തുര്‍ക്കി ഇന്റലിജന്‍സുമായി അടുത്ത വൃത്തങ്ങളെ ഉദ്ധരിച്ചു ബി.ബി.സി ചാനലാണ് ഈ വാര്‍ത്ത പുറത്തുവിട്ടിരുന്നത്.
എന്നാല്‍, കോണ്‍സുലേറ്റിലെത്തിയ കഷോഗി അധികം വൈകാതെ സ്ഥലംവിട്ടിരുന്നതായാണ് സഊദിയുടെ വാദം. ഇതു തെറ്റാണെന്നു വ്യക്തമാക്കുന്ന തെളിവുകള്‍ തുര്‍ക്കി അധികൃതരുടെ കൈവശമുണ്ടെന്നാണ് വിവരം. കോണ്‍സുലേറ്റിനകത്തു കഷോഗിക്കുനേരെ കൈയേറ്റമുണ്ടാകുകയും തുടര്‍ന്ന് അദ്ദേഹം കൊല്ലപ്പെടുകയും ചെയ്തതായാണ് വെളിപ്പെടുത്തല്‍.
സഊദി കിരീടാവകാശി മുഹമ്മദ് ബിന്‍ സല്‍മാന്റെ വിമര്‍ശകനായിരുന്ന ജമാല്‍ കഷോഗി ഈ മാസം രണ്ടിനാണ് ഇസ്താംബുളിലെ സഊദി കോണ്‍സുലേറ്റിലെത്തിയത്. മുന്‍ ഭാര്യയെ മൊഴിചൊല്ലിയതുമായി ബന്ധപ്പെട്ട നിയമ നടപടികള്‍ പൂര്‍ത്തിയാക്കാനായിരുന്നു ഇത്. പ്രതിശ്രുത വധുവായ തുര്‍ക്കി സ്വദേശിനിയും കൂടെയുണ്ടായിരുന്നു. കോണ്‍സുലേറ്റിനു പുറത്തുനിര്‍ത്തിയ ഇവരോട്, തന്നെ കാണാതായാല്‍ തുര്‍ക്കി അധികൃതരെ വിവരമറിയിക്കണമെന്നും കഷോഗി നിര്‍ദേശിച്ചിരുന്നു. പിന്നീട് ഇദ്ദേഹത്തെക്കുറിച്ചു വിവരങ്ങളൊന്നും ലഭിച്ചിട്ടില്ല.