ജിദ്ദ: ഈ വര്‍ഷം ആഭ്യന്തര ഹജ്ജ് തീര്‍ഥാടകര്‍ക്ക് പതിവില്ലാത്ത യാതൊരു സൗജന്യവും ലഭിക്കില്ലെന്ന് ഹജ്, ഉംറ മന്ത്രാലയ വൃത്തങ്ങള്‍ അറിയിച്ചു.

ആഭ്യന്തര ഹജ്ജ് തീര്‍ഥാടകരില്‍നിന്ന് ഈ വര്‍ഷം ഫീസുകളും നിരക്കുകളും ഈടാക്കില്ലെന്ന് സാമൂഹിക മാധ്യമങ്ങളില്‍ പ്രചരിക്കുന്നുണ്ട്. സൗജന്യമായി ഹജ്ജ് നിര്‍വഹിക്കുന്നതിന് ആഭ്യന്തര തീര്‍ഥാടകര്‍ക്ക് അവസരം ലഭിക്കുമെന്നാണ് സന്ദേശം. എന്നാല്‍ ഇത് ശരിയല്ലെന്ന് മന്ത്രാലയ വൃത്തങ്ങള്‍ വ്യക്തമാക്കി.

വിദേശങ്ങളില്‍നിന്ന് ആദ്യമായി ഹജ്ജും ഉംറയും നിര്‍വഹിക്കുന്നതിന് വരുന്ന തീര്‍ഥാടകര്‍ക്ക് ഫീസില്ലാതെ വിസ അനുവദിക്കുക മാത്രമാണ് ചെയ്യുക. ഹജ്ജ്്, ഉംറ തീര്‍ഥാടകര്‍ക്ക് രണ്ടായിരം റിയാല്‍ വീതം ഫീസ് ബാധകമാക്കുന്നതിന് കഴിഞ്ഞ വര്‍ഷം മന്ത്രിസഭ തീരുമാനിച്ചിരുന്നു. എന്നാല്‍ ആദ്യമായി ഹജും ഉംറയും നിര്‍വഹിക്കുന്നതിന് വരുന്നവരുടെ വിസാ ഫീസ് സര്‍ക്കാര്‍ വഹിക്കും.

കഴിഞ്ഞ മുഹര്‍റം ഒന്നു മുതല്‍ ഇതു നടപ്പാക്കിത്തുടങ്ങിയിട്ടുണ്ട്. വിദേശങ്ങളില്‍നിന്ന് ഹജ്ജും ഉംറയും നിര്‍വഹിക്കുന്നതിന് വരുന്നവരുമായി മാത്രം ബന്ധപ്പെട്ട തീരുമാനമാണിത്. സഊദിക്കകത്തുള്ള വിദേശികള്‍ക്കും സഊദി പൗരന്മാര്‍ക്കും ഏതു സമയവും ഉംറ നിര്‍വഹിക്കാവുന്നതാണ്.

ഇതിന് പ്രത്യേക ഫീസൊന്നും ബാധകമല്ല. സഊദിയില്‍നിന്ന് ഹജ്ജ് നിര്‍വഹിക്കുന്നതിന് ആഗ്രഹിക്കുന്നവര്‍ ഇട്രാക്കില്‍ രജിസ്റ്റര്‍ ചെയ്ത് ജ്ജ് സര്‍വീസ് കമ്പനികള്‍ക്കുള്ള സേവന നിരക്ക് ഇപെയ്‌മെന്റ് സംവിധാനമായ സദ്ദാദ് വഴി അടയ്ക്കുകയാണ് വേണ്ടതെന്നും മന്ത്രാലയ വൃത്തങ്ങള്‍ അറിയിച്ചു.