കണ്ണൂര്‍: പയ്യാമ്പലം ബീച്ചില്‍ തിരയില്‍പ്പെട്ട് അപകടത്തിലായ യുവാവിനെ രക്ഷപ്പെടുത്തി. കോയമ്പത്തൂര്‍ ശ്രീകൃഷ്ണ എന്‍ജിനീയറിങ് കോളജ് വിദ്യാര്‍ഥികളായ 12 പേര്‍ കടലില്‍ കുളിക്കുന്നതിനിടെയാണ് സംഘത്തിലുണ്ടായിരുന്ന പ്രഭാകര്‍ (20) എന്ന വിദ്യാര്‍ഥി തിരയില്‍പ്പെട്ടത്. ഇന്നലെ ഉച്ചയ്ക്ക് 12 മണിയോടെയായിരുന്നു സംഭവം.
അപകടം കണ്ടവര്‍ പെട്ടെന്ന് വിവരമറിയിച്ചതിനെ തുടര്‍ന്നാണ് ലൈഫ് ഗാര്‍ഡ് എത്തി രക്ഷപ്പെടുത്തിയത്. പയ്യമ്പാലം ലൈഫ് ഗാര്‍ഡായ ഏഴിമല സ്വദേശി ചാള്‍സണ്‍ അപകട സ്ഥലത്തുനിന്നും ഏറെ ദൂരെയായിരുന്നു സംഭവ സമയത്ത് ഉണ്ടായിരുന്നത്. വിവരം ലഭിച്ചതിനെ തുടര്‍ന്ന് പെട്ടെന്ന് തന്നെ എത്തിയതിനാലാണ് പ്രഭാകറിനെ രക്ഷിക്കാന്‍ സാധിച്ചത്. ഫയര്‍ഫോയ്‌സ്, പൊലിസ് കണ്‍ട്രോള്‍ റൂം എന്നിവര്‍ സ്ഥലത്തെത്തിയിരുന്നു. പ്രഭാകറിനെ ജില്ലാ ആശിപത്രിയിലും പിന്നീട് എ.കെ.ജി ആശുപത്രിയിലും പ്രവേശിപ്പിച്ചു.