ബാഡ്മിന്റണ്‍ പരിശീലകന്‍ എസ്. മുരളീധരന് ഒളിംപ്യന്‍ സുരേഷ്ബാബു ലൈഫ് ടൈം അച്ചീവ്‌മെന്റ് അവാര്‍ഡ്
തിരുവനന്തപുരം: ഒളിംപ്യന്മാരായ ജിന്‍സണ്‍ ജോണ്‍സണും വി. നീനയ്ക്കും സംസ്ഥാന സ്‌പോര്‍ട്‌സ് കൗണ്‍സിലിന്റെ ജി.വി രാജ പുരസ്‌കാരം. 2017 ലെ മികച്ച പുരുഷ താരമായി ജിന്‍സണും വനിതാ താരമായി നീനയും തിരഞ്ഞെടുക്കപ്പെട്ടു. മൂന്ന് ലക്ഷം രൂപയും ഫലകവും പ്രശംസാ പത്രവും അടങ്ങുന്നതാണ് പുരസ്‌കാരമെന്ന് കായിക മന്ത്രി ഇ.പി ജയരാജന്‍ വാര്‍ത്താ സമ്മേളനത്തത്തില്‍ അറിയിച്ചു. ഒളിംപ്യന്‍ സുരേഷ്ബാബു ലൈഫ് ടൈം അച്ചീവ്‌മെന്റ് അവാര്‍ഡിന് ബാഡ്മിന്റണ്‍ പരിശീലകന്‍ എസ്. മുരളീധരന്‍ അര്‍ഹനായി. രണ്ട് ലക്ഷം രൂപയും ഫലകവും പ്രശംസാ പത്രവും അടങ്ങുന്നതാണ് പുരസ്‌കാരം. മികച്ച പരിശീലകനായി സംസ്ഥാന സ്‌പോര്‍ട്‌സ് കൗണ്‍സില്‍ വോളിബോള്‍ പരിശീലകന്‍ എസ്. മനോജിനെ തിരഞ്ഞെടുത്തു. ഒരു ലക്ഷം രൂപയും ഫലകവും പ്രശംസാ പത്രവും അടങ്ങുന്നതാണ് അവാര്‍ഡ്. കോളജ് തലത്തിലെ മികച്ച കായികാധ്യാപകനുള്ള പുരസ്‌കാരം കോതമംഗലം മാര്‍ അത്താനേഷ്യസ് കോളജിലെ ഡോ. മാത്യൂസ് ജേക്കബ് അര്‍ഹനായി. 50000 രൂപയും ഫലകവും പ്രശംസാ പ ത്രവും അടങ്ങുന്നതാണ് അവാര്‍ഡ്.
മികച്ച കായിക നേട്ടങ്ങള്‍ കൈവരിച്ച കോളജായി ചങ്ങനാശ്ശേരി അസംപ്ഷന്‍ കോളജ് തിരഞ്ഞെടുക്കപ്പെട്ടു. 50000 രൂപയും ഫലകവും പ്രശംസാ പത്രവും അടങ്ങുന്നതാണ് പുരസ്‌കാരം. സ്‌കൂള്‍തല സ്‌പോര്‍ട്‌സ് ഹോസ്റ്റല്‍ (വനിത) വിഭാഗത്തില്‍ ഏറ്റവും മികച്ച കായിക നേട്ടങ്ങള്‍ കരസ്ഥമാക്കിയ കായികതാരമായി കൊല്ലം സെന്‍ട്രലൈസ്ഡ് സ്‌പോര്‍ട്‌സ് ഹോസ്റ്റലിലെ അബിഗെയില്‍ ആരോഗ്യനാഥന്‍ തിരഞ്ഞെടുക്കപ്പെട്ടു.
50000 രൂപയും ഫലകവും പ്രശംസാ പത്രവും അടങ്ങുന്നതാണ് അവാര്‍ഡ്. കോളജ്തല സ്‌പോര്‍ട്‌സ് ഹോസ്റ്റല്‍ (വനിത) വിഭാഗത്തില്‍ ഏറ്റവും മികച്ച കായിക നേട്ടങ്ങള്‍ കരസ്ഥമാക്കിയ കായികതാരമായി ജിന്‍സി ജിന്‍സണ്‍ (അസംപ്ഷന്‍ കോളേജ് ചങ്ങനാശ്ശേരി)തിരഞ്ഞെടുക്കപ്പെട്ടു.
50000 രൂപയും ഫലകവും പ്രശംസാ പത്രവും അടങ്ങുന്നതാണ് അവാര്‍ഡ്. മതിയായ യോഗ്യതയുള്ള അപേക്ഷകര്‍ ഇല്ലാത്തതിനാല്‍ മികച്ച സ്‌കൂള്‍ കായിക അധ്യാപകനുള്ള അവാര്‍ഡ് പ്രഖ്യാപിച്ചില്ല. മികച്ച കായിക നേട്ടം കൈവരിച്ച സ്‌കൂളുകളുടെ അപേക്ഷകള്‍ ലഭിച്ചിട്ടില്ലാത്തതിനാല്‍ മികച്ച സ്‌കൂളിനുള്ള അവാര്‍ഡും പ്രഖ്യാപിച്ചില്ല.
കോളജ്, സ്‌കൂള്‍തല സ്‌പോര്‍ട്‌സ് ഹോസ്റ്റല്‍ വിഭാഗത്തില്‍ (ആണ്‍കുട്ടികള്‍) അപേക്ഷകള്‍ ലഭിക്കാതിരുന്നതിനാല്‍ മികച്ച കോളജ്, സ്‌കൂള്‍തല സ്‌പോര്‍ട്‌സ് ഹോസ്റ്റല്‍ ആണ്‍കുട്ടികള്‍ക്കുള്ള അവാര്‍ഡും പ്രഖ്യാപിച്ചില്ല. വാര്‍ത്താ സമ്മേളനത്തില്‍ സ്‌പോര്‍ട്‌സ് കൗണ്‍സില്‍ പ്രസിഡന്റ് ടി.പി ദാസന്‍, കായിക വകുപ്പ് സെക്രട്ടറി ഡോ. ജയതിലക്, സ്‌പോര്‍ട്‌സ് കൗണ്‍സില്‍ സെക്രട്ടറി സഞ്ജയന്‍കുമാര്‍, സ്‌പോര്‍ട്‌സ് കൗണ്‍സില്‍ അംഗം എം.ആര്‍ രഞ്ജിത് പങ്കെടുത്തു.