കൊച്ചി: ബന്ധുനിയമനവുമായി ബന്ധപ്പെട്ടുള്ള വിജിലന്‍സ് കേസ് റദ്ദാക്കാന്‍ മുന്‍മന്ത്രി ഇ.പി ജയരാജനും, ശങ്കര്‍റെഡ്ഢിക്ക് ഡി.ജി.പിയായി പ്രൊമോഷന്‍ നല്‍കിയതില്‍ ക്രമക്കേടുണ്ടെന്ന വിജിലന്‍സ് കേസ് റദ്ദാക്കാന്‍ പ്രതിപക്ഷ നേതാവ് രമേശ് ചെന്നിത്തലയും നല്‍കിയ ഹരജികള്‍ ഹൈക്കോടതി 13 ന് പരിഗണിക്കാന്‍ മാറ്റി. രണ്ടു ഹരജികളിലും പ്രോസിക്യൂഷന്റെ അന്തിമവാദമാണ് ഇനി നടക്കാനുള്ളത്. രണ്ടു കേസുകളിലും അഴിമതി നിരോധന നിയമപ്രകാരം നടപടി സാധ്യമല്ലെന്ന് സര്‍ക്കാര്‍ നേരത്തെ ഹൈക്കോടതിയില്‍ ബോധിപ്പിച്ചിരുന്നു.
ശങ്കര്‍ റെഡ്ഢിക്ക് പ്രൊമോഷന്‍ നല്‍കിയതില്‍ ക്രമക്കേടുണ്ടെന്ന് ചൂണ്ടിക്കാട്ടി വിജിലന്‍സില്‍ പരാതി നല്‍കിയ പൈച്ചിറ നവാസിനെതിരേ നടപടിക്ക് സാധ്യതയുണ്ടോയെന്ന് സിംഗിള്‍ബെഞ്ച് പരിശോധിക്കുന്നുണ്ട്. മുഖ്യമന്ത്രിയും മന്ത്രിമാരുമടക്കം വിവിധ വ്യക്തികളെ പ്രതിയാക്കി പൈച്ചിറ നവാസ് 44 കേസുകളാണ് നല്‍കിയിട്ടുള്ളതെന്ന് പൊലിസ് കോടതിയില്‍ റിപ്പോര്‍ട്ട് നല്‍കിയിരുന്നു.