ലഖ്‌നൗ: മുസഫര്‍ നഗര്‍ കലാപക്കേസിലെ പ്രതിയെ അടക്കം 18 പേരെ ഉള്‍പ്പെടുത്തി ഉത്തര്‍പ്രദേശിലെ യോഗി ആദിത്യനാഥ് മന്ത്രിസഭ പുനഃസംഘടിപ്പിച്ചു. നിലവിലെ ആറു പേരെ ഒഴിവാക്കിയും പുതുതായി 23 അംഗങ്ങളെ ചേര്‍ത്തുമാണ് പുനഃസംഘടന. സ്വതന്ത്ര ചുമതലയുള്ള നാലുമന്ത്രിമാരെ കാബിനറ്റ് മന്ത്രിമാരായും ഉയര്‍ത്തി. പുതുതായി മന്ത്രിസഭയില്‍ ചേര്‍ന്ന 23 മന്ത്രിമാര്‍ക്ക് ഇന്നലെ ഗവര്‍ണര്‍ ആനന്ദിബെന്‍ പട്ടേല്‍ സത്യവാചകം ചൊല്ലി കൊടുത്തു. ഇതോടെ യോഗി മന്ത്രിസഭാംഗങ്ങളുടെ എണ്ണം 43 ആയി.
ഡോ. മഹേന്ദ്ര സിങ്, സുരേഷ് റാണ, ഭൂപ്പേന്ദ്ര സിങ് ചൗധരി, അനില്‍ രജ്ഭാര്‍, രാംനരേശ് അഗ്നിഹോത്രി, കമലാ റാണി വരുണ്‍ എന്നിവരാണ് കാബിനറ്റ് പദവിയുള്ള മന്തിമാര്‍. നീലകാന്ത് തിവാരി, കപില്‍ദേവ് അഗര്‍വാള്‍, സതീഷ് ദ്വിവേദി, അശോക് കടാരിയ, ശ്രീറാം ചൗഹാന്‍, രവീന്ദ്ര ജയ്‌സാള്‍ എന്നിവരാണ് സ്വതന്ത്ര ചുമതലയുള്ള മന്ത്രിമാര്‍.
കാബിനറ്റ് മന്ത്രിയായി സ്ഥാനക്കയറ്റം ലഭിച്ച സുരേഷ് റാണ 2013ലെ മുസഫര്‍ നഗര്‍ കലാപക്കേസ് പ്രതിയാണ്. പശ്ചിമ യു.പിയിലെ താന ഭവനില്‍ നിന്നുള്ള എം.എല്‍.എയാണ് 49 കാരനായ സുരേഷ് റാണ. മതത്തിന്റെ പേരില്‍ ശത്രുത വളര്‍ത്തി, നിയമവിരുദ്ധമായി സംഘംചേര്‍ന്നു, കലാപം തുടങ്ങിയ വകുപ്പുകള്‍ പ്രകാരമാണ് ഇയാള്‍ക്കെതിരെ കേസുള്ളത്. കലാപം സൃഷ്ടിക്കുന്ന വിധത്തില്‍ പ്രകോപനപരമായി പ്രസംഗിച്ചതിന് 2013 സപ്റ്റംബറില്‍ ഇയാളെ അറസ്റ്റ് ചെയ്തിരുന്നു.