കൊല്ലം: മലയാളഭാഷാ പഠനം ഒന്നാം ക്ലാസു മുതല്‍ പത്താം ക്ലാസ് വരെ നിര്‍ബന്ധമാക്കി നിയമനിര്‍മാണം നടത്തുകയും മാതൃഭാഷാ വികസനത്തിനുവേണ്ട പദ്ധതികള്‍ ആവിഷ്‌ക്കരിക്കുകയും ചെയ്യുന്ന  സര്‍ക്കാര്‍ മലയാള ഭാഷാ സേവകരായ കുടിപ്പള്ളിക്കൂടം (നിലത്തെഴുത്ത്) ആശാന്മാരെ തീരെ അവഗണിച്ചിരിക്കുകയാണെന്ന് അഖില കേരള കുടിപ്പള്ളിക്കൂടം ആശാന്‍ അസോസിയേഷന്‍ പ്രവര്‍ത്തക സമ്മേളനം ആരോപിച്ചു.
തിരുവനന്തപുരം, കൊല്ലം, ആലപ്പുഴ, പത്തനംതിട്ട, കോട്ടയം ജില്ലകളിലാണ് ആശാന്മാര്‍ ഏറെയുള്ളത്. ആശാന്മാര്‍ നിരന്തരം നടത്തിയ  സമരങ്ങളുടെ  പശ്ചാത്തലത്തില്‍ തദ്ദേശ സ്വയംഭരണ സ്ഥാപനങ്ങളില്‍ നിന്നും 2012 ഡിസംബര്‍ മുതല്‍ പ്രതിമാസം 500 രൂപ ഗ്രാന്റായി ലഭിച്ചുകൊണ്ടിരിക്കുകയാണ്. ഈ തുക വര്‍ധിപ്പിക്കണമെന്നാവശ്യപ്പെട്ട് യു.ഡി.എഫ് സര്‍ക്കാരിനും എല്‍.ഡി.എഫ് സര്‍ക്കാരിനും നിരവധിതവണ നിവേദനങ്ങള്‍ നല്‍കുകയും സെക്രട്ടറിയേറ്റ് പടിക്കല്‍ സത്യഗ്രഹസമരം നടത്തുകയും ചെയ്‌തെങ്കിലും  യാതൊരു ഫലവും ഉണ്ടായിട്ടില്ല.
ഗ്രാന്റ്തന്നെ തദ്ദേശസ്ഥാപനങ്ങളുടെ തനത് ഫണ്ടില്‍ നിന്നാണ് നല്‍കി വരുന്നത്. അതുകൊണ്ടുതന്നെ വരുമാനമില്ലാത്ത പല പഞ്ചായത്തുകളില്‍ നിന്നും ഇത് ലഭിക്കാറുമില്ല.
ഗ്രാന്റ് തുക പ്രതിമാസം 2000 രൂപയാക്കി വര്‍ധിപ്പിച്ച് സര്‍ക്കാര്‍ തന്നെ നേരിട്ടു നല്‍കി മതൃഭാഷാ സേവനം നടത്തുന്ന നിലത്തെഴുത്ത് ആശാന്മാരെ സംരക്ഷിക്കാന്‍ സര്‍ക്കാര്‍ തയാറാകണമെന്ന് സമ്മേളനം ആവശ്യപ്പെട്ടു. പ്രസിഡന്റ് പന്മന ഗോപിനാഥന്‍ നായര്‍ അധ്യക്ഷത വഹിച്ചു. രക്ഷാധികാരി ചവറ സുരേന്ദ്രന്‍പിള്ള ഉദ്ഘാടനം ചെയ്തു. ജനറല്‍ സെക്രട്ടറി ഇടക്കുളങ്ങര തുളസി, ട്രഷറര്‍ എം.പ്രീതി, സെക്രട്ടറി ടി.ഗംഗ തുടങ്ങിയവര്‍ സംസാരിച്ചു.