അങ്കാറ: മുതിര്‍ന്ന സഊദി മാധ്യമപ്രവര്‍ത്തകന്‍ ജമാല്‍ കഷോഗിയുടെ തിരോധാനത്തില്‍ അന്വേഷണം മറ്റു സംശയാസ്പദമായ പ്രദേശങ്ങളിലേക്കു കൂടി അന്വേഷണം സംഘം വ്യാപിപ്പിച്ചു. സംഭവം നടന്ന പ്രദേശത്തിനടുത്തുള്ള വനത്തില്‍ ആരംഭിച്ച തിരച്ചില്‍ തുടരുകയാണ്. ഇവിടെ ബെല്‍ഗ്രാഡ് വനത്തിലോ പരിസരത്തെ കൃഷിനിലങ്ങളിലോ മൃതദേഹം ഉപേക്ഷിച്ചിരിക്കാമെന്ന നിഗമനത്തിലാണു തിരച്ചില്‍ നടക്കുന്നത്. കഷോഗിയെ കാണാതായ ദിവസം ഇസ്തംബൂളിലെ സഊദി കോണ്‍സുലേറ്റില്‍നിന്ന് രണ്ടു വാഹനങ്ങള്‍ ബെല്‍ഗ്രേഡ് വനത്തിന്റെ ഭാഗത്തേക്കു പോയതായി അന്വേഷണസംഘം കണ്ടെത്തിയിരുന്നു.
അതിനിടെ, സംഭവവുമായി ബന്ധപ്പെട്ടുള്ള ഒരു തരത്തിലുമുള്ള ശബ്ദരേഖയോ വിഡിയോ ദൃശ്യങ്ങളോ യു.എസ് വിദേശകാര്യ സെക്രട്ടറി മൈക്ക് പോംപിയോക്ക് കൈമാറിയിട്ടില്ലെന്ന് തുര്‍ക്കി വ്യക്തമാക്കി. തുര്‍ക്കി വിദേശകാര്യ മന്ത്രി മെവ്‌ലൂത് കാവുസോഗ്‌ലു ആണ് ഇക്കാര്യം വ്യക്തമാക്കിയത്. രണ്ടു ദിവസം മുന്‍പ് ഔദ്യോഗിക കൂടിക്കാഴ്ചയ്ക്കായി പോംപിയോ അങ്കാറയിലെത്തിയിരുന്നു. കൂടിക്കാഴ്ചയ്ക്കിടെ സംഭവവുമായി ബന്ധപ്പെട്ട് തുര്‍ക്കി അധികൃതരുടെ പക്കലുള്ള വിഡിയോ ദൃശ്യങ്ങളും ശബ്ദരേഖയും പോംപിയോയെ കാണിച്ചിരുന്നതായി യു.എസ് ചാനലായ എ.ബി.സി ന്യൂസ് റിപ്പോര്‍ട്ട് ചെയ്തിരുന്നു. ഇക്കാര്യം പോംപിയോയും നിഷേധിച്ചിട്ടുണ്ട്.
നേരത്തെ, സഊദി കോണ്‍സുലേറ്റിലെ ജീവനക്കാരായ 15 തുര്‍ക്കി പൗരന്മാരില്‍നിന്ന് അന്വേഷണ ഉദ്യോഗസ്ഥര്‍ മൊഴിയെടുത്തിട്ടുണ്ട്.