ബെയ്ജിങ്: ചൈന അറസ്റ്റ് ചെയ്ത ഇന്റര്‍പോള്‍ മുന്‍ തലവന്റെ ജീവിതം അപകടത്തിലെന്നു ഭാര്യ. ഇന്റര്‍പോള്‍ മുന്‍ പ്രസിഡന്റ് മെങ് ഹോങ്‌വെയിയുടെ ഭാര്യ ഗ്രെയ്‌സ് മെങ്ങാണ് ചൈനീസ് ഭരണകൂടത്തിനെതിരേ ആരോപണവുമായി രംഗത്തെത്തിയിരിക്കുന്നത്.
മെങ്ങിന്റെ അറസ്റ്റിനു പിന്നില്‍ രാഷ്ട്രീയതാല്‍പര്യങ്ങളുണ്ട്. അദ്ദേഹം ജീവിച്ചിരിപ്പുണ്ടോയെന്ന കാര്യം തന്നെ എനിക്ക് ഉറപ്പില്ല. അച്ഛന്‍ ദീര്‍ഘ ബിസിനസ് യാത്രയിലാണെന്നു പറഞ്ഞു മക്കളെ ആശ്വസിപ്പിച്ചിരിക്കുകയാണ്. വിമതശബ്ദങ്ങളെ അടിച്ചമര്‍ത്താന്‍ ചൈന ചെയ്യുന്ന കൃത്യങ്ങള്‍ അതിരില്ലാത്തതാണ്. ക്രൂരരും വൃത്തികെട്ടവരുമാണവര്‍. ഞാന്‍ ഭര്‍ത്താവിനു നീതിക്കായി മുന്നോട്ടുപോകും. എന്റെ അനുഭവം ഇനിയൊരു ഭാര്യയ്ക്കും കുട്ടികള്‍ക്കും ഉണ്ടാകരുത്-ഗ്രെയ്‌സ് മെങ് പറഞ്ഞു.കഴിഞ്ഞ മാസം നാട്ടിലെത്തിയപ്പോഴാണ് മെങ്ങിനെ ചൈനീസ് അധികൃതര്‍ തടങ്കലിലാക്കിയത്. ഈ മാസം ഏഴിന് അദ്ദേഹം ഇന്റര്‍പോള്‍ പ്രസിഡന്റ് സ്ഥാനം രാജിവച്ചിരുന്നു.