കൊണ്ടോട്ടി: സംസ്ഥാന ഹജ്ജ് കമ്മിറ്റിക്ക് കീഴില്‍ ഹജ്ജിന് പോയവരില്‍ 4207 ഹാജിമാര്‍ മടങ്ങിയെത്തി. ഇന്നലെവരെ 14 വിമാനങ്ങളില്‍ 4192 പേരും 15 പേര്‍ സ്വന്തമായി വിമാന ടിക്കറ്റെടുത്ത് യാത്രാ വിമാനങ്ങളിലുമാണ് വന്നത്.
ഇന്നലെ രണ്ടു വിമാനങ്ങളിലായി 599 പേരാണ് എത്തിയത്. രണ്ടു വിമാനങ്ങളിലും കൂടുതല്‍ പേരും വനിതകളായിരുന്നു. ഇന്ന് മൂന്ന് വിമാനങ്ങളിലായി 900 ഹാജിമാരാണ് മടങ്ങിയെത്തുക.
ഹാജിമാര്‍ ഇതുവരെയായി 4,49,622 രൂപയാണ് മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കിയത്. ഹജ്ജിന് പോയവരില്‍ നാലുപേര്‍ മക്കയില്‍ വച്ചും ഒരാള്‍ മടങ്ങുന്ന വഴി വിമാനത്തില്‍ വച്ചും മരിച്ചിട്ടുണ്ട്. ഹജ്ജ് വിമാന സര്‍വിസുകള്‍ അടുത്തമാസം മൂന്നിന് അവസാനിക്കും.