നെടുമങ്ങാട്: പെരിങ്ങമ്മലയില്‍ മാലിന്യ പ്ലാന്റ് വേണ്ടെന്ന ആവശ്യവുമായി പെരിങ്ങമ്മല പരിസ്ഥിതി സംരക്ഷണ സമിതി മാലിന്യ പ്ലാന്റ് വിരുദ്ധ ആക്ഷന്‍ കമ്മിറ്റിയുടെ നേതൃത്വത്തില്‍ നടന്നു വരുന്ന അനിശ്ചിത കാല സമരം 110 ദിവസം പിന്നിട്ടു.
പരിസ്ഥിതിയെയും ജൈവവൈവിധ്യ സമ്പത്തും, ആദിവാസികളടക്കമുള്ള ജനവിഭാഗങ്ങളെയും സംരക്ഷിക്കണമെന്ന് ആവശ്യപ്പെട്ടുള്ള പ്രധിഷേധം വരും ദിവസങ്ങളില്‍ ശക്തമാക്കാനാണ് സമര സമിതിയുടെ തീരുമാനം. ഇതിന്റെ ഭാഗമായി പെരിങ്ങമ്മല ഗ്രാമ പഞ്ചായത്ത് മാലിന്യ പ്ലാന്റിനെതിരേ പ്രമേയം പാസാക്കണമെന്ന് ആവശ്യപ്പെട്ട് പ്രതിപക്ഷ അംഗങ്ങള്‍ കത്തു നല്‍കി. പത്തു ദിവസത്തിനകം ഈ വിഷയത്തില്‍ പഞ്ചായത്ത് കമ്മിറ്റി അനുകൂല തീരുമാനമെടുത്തില്ലെങ്കില്‍ പഞ്ചായത്ത് ഓഫിസിന് മുന്നിലും അനിശ്ചിത കാല സമരം ആരംഭിക്കും.
നിലവില്‍ പന്നിയോട്ടുകടവിലെ സമരപന്തല്‍ നിലനിര്‍ത്തിക്കൊണ്ട് തന്നെയാണ് പഞ്ചായത്തിന് മുന്നില്‍ സമരം ആരംഭിക്കുന്നത്. ഇതോടൊപ്പം സമരം മറ്റു താലൂക്കുകളിലേക്കു വ്യാപിപ്പിക്കാനാണ് സമര സമിതിയുടെ തീരുമാനം. നെടുമങ്ങാട്, ചിറയിന്‍കീഴ്, വര്‍ക്കല താലൂക്കുകളിലാണ് സമരം വ്യാപിപ്പിക്കുന്നത്. ഇതിനായി വാമനപുരം നദി സംരക്ഷണ സമരത്തിന്റെ പ്രവര്‍ത്തനങ്ങള്‍ സജീവമാക്കി. ഈ സമരത്തിന്റെ പ്രഖ്യാപന സമ്മേളനം 24ന് വൈകിട്ട് നാലിന് കല്ലറ എ.ആര്‍.എസ് തിയറ്ററില്‍ നടക്കും. പെരിങ്ങമ്മല, നന്ദിയോട്, വിതുര, തൊളിക്കോട്, പഞ്ചായത്തുകളിലെ അന്‍പതോളം റസിഡന്റ്‌സ് അസോസിയേഷനുകളിലെ ഭാരവാഹികള്‍ ഇന്ന് രാവിലെ 11ന് ഗാര്‍ഡ് സ്റ്റേഷനില്‍ നിന്ന് സമര പന്തലിലേക്ക് ഐക്യദാര്‍ഢ്യ പ്രകടനം നടത്തും. ഇതോടൊപ്പം സമരത്തിന് ഐക്യദാര്‍ഡ്യം പ്രകടിപ്പിച്ച് ജില്ലാ പഞ്ചായത്ത് പ്രതിപക്ഷ നേതാവ് ആനാട് ജയന്റെ നേതൃത്വത്തില്‍ ഇന്ന് രാവിലെ എട്ടിന് നെടുമങ്ങാട് നിന്നും ആരംഭിച്ച് ആനാട്, നന്ദിയോട്, പാലോട്, പെരിങ്ങമ്മല വഴി സമര പന്തലിലേക്ക് നടത്തുന്ന ഐക്യദാര്‍ഢ്യ പദയാത്ര വൈകിട്ട് നാലോടെ സമര പന്തലില്‍ എത്തിചേരും. കേരളാ ശാസ്ത്ര സാഹിത്യ പരിഷത് മേഖലാ കമ്മിറ്റി ഇന്ന് രാവിലെ ഒന്‍പതിന് പരിസ്ഥിതി സംരക്ഷണ പദയാത്ര നടത്തും. വരും ദിവസങ്ങളില്‍ പ്ലാന്റ് വിരുദ്ധ സമരം ശക്തമാക്കാനാണ് സമര സമിതി തീരുമാനം.