സൂറിച്ച്: ആവേശകരമായ പോരാട്ടത്തിനൊടുവില്‍ ചൈനയുടെ ചെന്‍ യൂഫേയിയെ നേരിട്ടുള്ള ഗെയിമുകളില്‍ പരാജയപ്പെടുത്തി സിന്ധു ബാഡ്മിന്റണ്‍ ലോക ചാംപ്യന്‍ഷിപ്പിന്റെ ഫൈനലില്‍ പ്രവേശിച്ചു. കഴിഞ്ഞ രണ്ട് തവണയും ഫൈനലില്‍ പ്രവേശിച്ച സിന്ധു സ്‌പെയിനിന്റെ കരോളിനോട് പരാജയപ്പെട്ടിരുന്നു. ലോക റാങ്കിങ്ങില്‍ മൂന്നാം നമ്പറുള്ള ചെന്‍ സിന്ധുവിന് മുന്നില്‍ പിടിച്ച് നില്‍ക്കുവാന്‍ പാട് പെട്ടപ്പോള്‍ ഇന്ത്യന്‍ താരം 21-7, 21-14 എന്ന സ്‌കോറിനായിരുന്നു വിജയിച്ചത്. തുടക്കം മുതല്‍ സിന്ധുവിന്റെ ആധിപത്യമായിരുന്നു. ആദ്യ ഗെയിമിന്റെ ഇടവേള സമയത്ത് സിന്ധു 11-3ന് മുന്നിലായിരുന്നു.
പിന്നീട് തിരിച്ചുവരവ് നടത്തുവാന്‍ എതിരാളിക്ക് അവസരം നല്‍കാതെ 21-7 എന്ന സ്‌കോറിന് ആദ്യ ഗെയിം സിന്ധു അനായാസമായി സ്വന്തമാക്കുകയായിരുന്നു.
രണ്ട@ാം ഗെയിമില്‍ ഇരു താരങ്ങളും ഒപ്പത്തിനൊപ്പമുള്ള പോരാട്ടമാണ് പുറത്തെടുത്തത്. എന്നാല്‍ മെല്ലെ ലീഡ് കൈവശപ്പെടുത്തിയ സിന്ധു ഇടവേള സമയത്ത് 11-7ന് മുന്നിട്ട് നിന്നു. ഇടവേളയ്ക്ക് ശേഷം ചെന്‍ തീര്‍ത്തും നിറം മങ്ങിയ പ്രകടനം പുറത്തെടുത്തപ്പോള്‍ സിന്ധു ഗെയിമും മത്സരവും അധികം ബുദ്ധിമുട്ടാതെ സ്വന്തമാക്കി.
സെമി ഫൈനലില്‍ ജപ്പാന്‍ താരം കെന്റോ മേമോട്ടയോട് പരാജയപ്പെട്ട സായ് പ്രണീതിന് വെങ്കലം കൊണ്ട് തൃപ്തിപ്പെടേണ്ടി വന്നു.
ശക്തമായ പോരാട്ടത്തിനൊടുവില്‍ 13-21, 8 -21 എന്ന സ്‌കോറിനായിരുന്നു പ്രണീതിന്റെ തോല്‍വി. വര്‍ഷങ്ങള്‍ക്ക് ശേഷമാണ് ഒരു പുരുഷ താരം ലോക ചാംപ്യന്‍ഷിപ്പില്‍ ഏതെങ്കിലുമൊരു മെഡല്‍ സ്വന്തമാക്കുന്നത്.