ജിദ്ദ : ഖത്തറുമായുള്ള ഭാവി പ്രശ്‌നങ്ങള്‍ ചര്‍ച്ച ചെയ്യാന്‍ വേണ്ടി ബഹ്‌റൈന്‍ ഭരണാധികാരി ഹമദ് ബിന്‍ ഈസ ആല്‍ ഖലീഫ ജിദ്ദയിലെത്തി. സല്‍മാന്‍ രാജാവുമായി കൂടിക്കാഴ്ച നടത്തിയ ശേഷം ബഹ്‌റൈന്‍ രാജാവ് വ്യാഴാഴ്ച ഈജിപ്തിലേക്ക് തിരിക്കും . ഈജിപ്ത് പ്രസിഡന്റ് സീസിയുമായി മേഖലയിലെ പുതിയ സംഭവ വികാസങ്ങള്‍ ചര്‍ച്ച ചെയ്യും .

സഊദിയും സുഹൃദ് രാജ്യങ്ങളും കഴിഞ്ഞ ദിവസം സ്വീകരിച്ച നടപടി ഖത്തറിന്റെയും മേഖലയുടെയും ഉത്തമ താല്‍പര്യത്തിനാണെന്നും ബാഹ്യസഹായമില്ലാതെ ഗള്‍ഫ് രാജ്യങ്ങള്‍ക്ക് തന്നെ പ്രശ്‌നം പരിഹരിക്കാന്‍ കഴിയുമെന്നും സഊദി വിദേശകാര്യ മന്ത്രി ആദില്‍ ജുബൈര്‍ പറഞ്ഞു.

ജര്‍മനിയുടെയോ ഫ്രാന്‍സിന്റെയും മധ്യസ്ഥത ആവശ്യപ്പെട്ടിട്ടില്ലെന്നും ജര്‍മന്‍ വിദേശകാര്യമന്ത്രിയുമൊത്ത് ബെര്‍ലിനില്‍ നടത്തിയ വാര്‍ത്തസമ്മേളനത്തില്‍ അദ്ദേഹം സൂചിപ്പിച്ചു.

സഊദി അറേബ്യയോടും മറ്റു രാജ്യങ്ങളോടും ശത്രുതവച്ചുപുലര്‍ത്തുന്ന മാധ്യമങ്ങള്‍ക്കും ഭീകര സംഘടനകള്‍ക്കും പിന്തുണ നല്‍കരുതെന്ന് ആവശ്യപ്പെടുന്ന കരാര്‍ ഖത്തര്‍ പാലിച്ചില്ല. വര്‍ഷങ്ങള്‍ക്കു മുമ്പുണ്ടാക്കിയ കരാറുകളൊന്നും ഖത്തര്‍ പാലിച്ചിട്ടില്ല. ഖത്തര്‍ ഗവണ്‍മെന്റിന്റെ ശത്രുതാ രാഷ്ട്രീയം ഗള്‍ഫ് രാജ്യങ്ങള്‍ അടക്കം മേഖലയിലെ എല്ലാ രാജ്യങ്ങളെയും ദോഷകരമായി ബാധിക്കുകയാണ്. ഖത്തറിനും ഖത്തര്‍ ജനതക്കും കോട്ടം തട്ടിക്കണമെന്ന് ഒരു രാജ്യവും ആഗ്രഹിക്കുന്നില്ല. ആര്‍ക്കൊപ്പമാണ് നിലയുറപ്പിക്കേണ്ടതെന്ന് ഖത്തര്‍ സ്വയം തീരുമാനിക്കുകയാണ് വേണ്ടത്.

ലോകത്ത് ഭീകരതക്ക് ഏറ്റവും വലിയ പിന്തുണ നല്‍കുന്ന രാജ്യം ഇറാനാണ്. മേഖലാ രാജ്യങ്ങളില്‍ നടത്തുന്ന ഇടപെടലുകള്‍ക്കും തീവ്രവാദ ഭീകര സംഘടനകള്‍ക്കും ഗ്രൂപ്പുകള്‍ക്കും നല്‍കുന്ന പിന്തുണക്കും ഇറാനെ ശിക്ഷിക്കണം. ഇറാന്‍ ഭരണകൂടത്തിന്റെ രാഷ്ട്രീയം ഒരു നിലക്കും അംഗീകരിക്കാനാവില്ല. ലോകത്ത് ഏറ്റവും കൂടുതല്‍ ബോംബുകള്‍ നിര്‍മിക്കുന്ന രാജ്യം ഇറാനാണ്. ഇറാന്‍ നിര്‍മിക്കുന്ന ബോംബുകളില്‍ 90 ശതമാനവും ഭീകര ഗ്രൂപ്പുകള്‍ക്കാണ് വിതരണം ചെയ്യുന്നത്. ഈ ബോംബുകള്‍ ആയിരക്കണക്കിന് നിരപരാധികളുടെ ജീവന്‍ അപഹരിച്ചു. അല്‍ഖാഇദ അടക്കമുള്ള ഭീകര സംഘടനകളുടെ നേതാക്കള്‍ക്ക് ഇറാന്‍ അഭയം നല്‍കുന്നുണ്ട്. 37 വര്‍ഷത്തിനിടെ 12 രാജ്യങ്ങളുടെ എംബസികള്‍ക്കു നേരെ ഇറാന്‍ ആക്രമണം നടത്തി. നയതന്ത്രജ്ഞരെ വധിക്കുന്നതിന് ഗൂഢാലോചന നടത്തുന്ന ഇറാന്‍ അന്താരാഷ്ട്ര നിയമങ്ങള്‍ നഗ്‌നമായി ലംഘിക്കുകയാണ്. മേഖലയില്‍ ഇറാന്‍ ഉണ്ടാക്കിത്തീര്‍ത്ത പ്രശ്‌നങ്ങളുടെ ഉത്തരവാദിത്തം ഇറാന്‍ വഹിക്കണമെന്നും ആദില്‍ അല്‍ജുബൈര്‍ ആവശ്യപ്പെട്ടു.

മേഖലയില്‍ ദീര്‍ഘകാലമായി ഖത്തര്‍ പിന്തുടരുന്ന രാഷ്ട്രീയ നിലപാടുകളാണ് ഖത്തറുമായുള്ള ബന്ധം വിച്ഛേദിക്കുന്നതിന് യു.എ.ഇ അടക്കമുള്ള രാജ്യങ്ങളെ പ്രേരിപ്പിച്ചതെന്ന് യു.എ.ഇ വിദേശകാര്യ സഹമന്ത്രി അന്‍വര്‍ ഗര്‍ഗാശ് പറഞ്ഞു.