ശ്രീകണ്ഠപുരം: സാക്ഷിപറഞ്ഞ യുവാവിനെ കൊലക്കേസ് പ്രതി വെട്ടിപരുക്കേല്‍പ്പിച്ചു. പൈസക്കരി വണ്ണായിക്കാവ് കുന്നുമ്മല്‍ ജിനേഷ് ജോസഫിനെ(25)യാണ് പരുക്കുകളോടെ തളിപ്പറമ്പ് സഹകരണ ആശുപത്രിയില്‍ പ്രവേശിപ്പിച്ചത്.പൈസക്കരിയിലെ വാഴക്കാട് ബാബുവാണ് ബുധനാഴ്ച ഉച്ചയ്ക്ക് ഏറ്റുപാറ റോഡില്‍വച്ച് ഇയാളെ വെട്ടിയത്.
2005ല്‍ പൈസക്കരിയിലെ അപ്പച്ചനെ കൊന്ന കേസിലെ പ്രതിയാണ് ബാബു. കേസില്‍ ശിക്ഷ കഴിഞ്ഞ് പുറത്തിറങ്ങിയ ബാബു പ്രതികാരം ചെയ്യാനായി ജിനേഷിനെ അന്വേഷിച്ചു നടക്കുകയായിരുന്നത്രേ. ജിനേഷിനെ വെട്ടിപരുക്കേല്‍പ്പിച്ചതിനു ശേഷം ബാബു രക്ഷപ്പെടുകയായിരുന്നു.