ദോഹ: ഖത്തറുമായി ബന്ധം വിഛേദിക്കാനുള്ള അയല്‍ രാജ്യങ്ങളുടെ തീരുമാനത്തിലൂടെ അതത് രാജ്യങ്ങളിലെ പതിനായിരത്തിലേറെ പേരുടെ മനുഷ്യാവകാശങ്ങള്‍ ലംഘിക്കപ്പെട്ടതായി ഖത്തര്‍ ദേശീയ മനുഷ്യാവകാശ സമിതി(എന്‍എച്ച്ആര്‍സി).

ദോഹയിലുണ്ടായിരുന്ന സൗദി അറേബ്യ, ബഹ്‌റയ്ന്‍, യുഎഇ എന്നീ രാജ്യങ്ങളിലെ 11,378 പൗരന്മാരെ നിര്‍ബന്ധിച്ച് തിരിച്ചു വിളിക്കുക വഴി സ്വതന്ത്രമായി സഞ്ചരിക്കാനും മറ്റുമുള്ള അവരുടെ അവകാശങ്ങളാണ് ലംഘിക്കപ്പെട്ടതെന്ന് എന്‍എച്ച്ആര്‍സി ഇന്നലെ വാര്‍ത്താസമ്മേളനത്തില്‍ ചൂണ്ടിക്കാട്ടി.

ജനങ്ങളുടെ സ്വതന്ത്രമായി സഞ്ചരിക്കാനുള്ള അവകാശം, ജോലി ചെയ്യാനുള്ള അവകാശം, ആരോഗ്യ, സ്വത്തവകാശം എന്നിവയെ ബാധിക്കുന്ന തരത്തിലുള്ള അയല്‍ രാജ്യങ്ങളുടെ തീരുമാനം വ്യക്തമായ മനുഷ്യാവകാശ ലംഘനമാണെന്ന് എന്‍എച്ച്ആര്‍സി അധ്യക്ഷന്‍ അലി ബിന്‍ സമൈക് അല്‍മര്‍റി പറഞ്ഞു.

കുടുംബങ്ങള്‍ ഭിന്നിക്കാനും വ്യാപാരങ്ങള്‍ തകരാനും മേഖലയിലെ വിദ്യാര്‍ഥികളുടെ വിദ്യാഭ്യാസം തടസ്സപ്പെടാനും ഇടായാക്കുന്നതാണ് അയല്‍ രാജ്യങ്ങളുടെ തീരുമാനം.

സൗദിയില്‍നിന്നുള്ള 8,254 പേര്‍, യുഎഇയില്‍ നിന്നുള്ള 784 പേര്‍, ബഹ്‌റയ്‌നില്‍ നിന്നുള്ള 2,439 പേരുമാണ് ഖത്തറിലുള്ളത്. അവരെല്ലാം തങ്ങളുടെ ജോലി ഉപേക്ഷിക്കുകയോ അല്ലെങ്കില്‍ അതത് രാജ്യങ്ങളില്‍ നിയമപരമായ പ്രത്യാഘാതം നേരിടുകയോ ചെയ്യേണ്ട സാഹചര്യമാണുള്ളത്.

ആയിരക്കണക്കിന് ഗള്‍ഫ് പൗരന്മാര്‍ മേഖലയിലെ വിവിധ രാജ്യങ്ങളില്‍ അങ്ങോട്ടും ഇങ്ങോട്ടും ബന്ധപ്പെട്ട് കഴിയുന്നുണ്ട്. വിവാഹ ബന്ധം, വ്യാപാര ബന്ധം, സര്‍ക്കാര്‍ ജോലിക്കാര്‍, വിവിധ യൂണിവേഴ്‌സിറ്റികളിലെ വിദ്യാര്‍ഥികള്‍ എന്നിങ്ങനെ നാല് ഗള്‍ഫ് രാജ്യങ്ങളിലെയും ജനങ്ങള്‍ ഇഴചേര്‍ന്നു കിടക്കുന്നു.

തങ്ങളുടെ നടപടിയുടെ പ്രത്യാഘാതങ്ങള്‍ വിശദമാക്കുന്ന റിപോര്‍ട്ട് യുഎഇ, ബഹ്‌റയ്ന്‍, സൗദി അറേബ്യ എന്നീ രാജ്യങ്ങള്‍ക്ക് അയക്കുമെന്ന് എന്‍എച്ച്ആര്‍സി അറിയിച്ചു. യൂറോപ്യന്‍ മനുഷ്യാവകാശ സംഘടനകളുമായും ബന്ധപ്പെടുമെന്ന് അല്‍മര്‍റി പറഞ്ഞു.