പേരാമ്പ്ര: ചെങ്ങോടുമലയില്‍ കരിങ്കല്‍ ഖനനത്തിനു സൗകര്യമൊരുക്കുന്നതിനു വേണ്ടി ബ്ലോക്ക് പഞ്ചായത്തിന്റെ കുടിവെള്ള ടാങ്ക് പൊളിച്ച ക്വാറി മാഫിയ പദ്ധതിയുടെ പൈപ്പ് കടത്തിക്കൊണ്ടുപോയതായി പരാതി. ഇതുസംബന്ധിച്ച് ആക്ഷന്‍ കമ്മിറ്റി പ്രവര്‍ത്തകര്‍ ബാലുശ്ശേരി പൊലിസ്, ബ്ലോക്ക് പഞ്ചായത്ത്, കോട്ടൂര്‍ ഗ്രാമ പഞ്ചായത്ത് എന്നിവിടങ്ങളില്‍ പരാതി നല്‍കി.
10 മാസം മുന്‍പ് ചെങ്ങോടുമല കുടിവെള്ള പദ്ധതിയുടെ ടാങ്ക് പൊളിക്കുകയും കിണറ്റില്‍നിന്ന് ടാങ്കിലേക്കുള്ള പൈപ്പ് കുഴിച്ചെടുത്ത് സമീപത്തെ ഉപയോഗശൂന്യമായ കിണറുകളില്‍ താഴ്ത്തുകയുമായിരുന്നു.
ഇതിനെതിരേ ആക്ഷന്‍ കമ്മിറ്റി പൊലിസില്‍ പരാതി കൊടുക്കുമെന്ന സൂചന ലഭിച്ചതിനെ തുടര്‍ന്ന് ക്വാറിമാഫിയ ഈ പൈപ്പുകള്‍ കഴിഞ്ഞദിവസം രാത്രി കിണറ്റില്‍ നിന്നെടുത്ത് ദൂരെ എവിടെയോ കൊണ്ടുപോയെന്നാണ് പരാതിയില്‍ പറയുന്നത്. കെ.എസ്.ഇ.ബിയുടെ വൈദ്യുതത്തൂണുകളും അലൂമിനിയം കമ്പികളും ഇങ്ങനെ കടത്തിയ കൂട്ടത്തില്‍ ഉള്ളതായി പരാതിയില്‍ പറയുന്നു.
സ്വകാര്യവ്യക്തി ബാലുശ്ശേരി ബ്ലോക്ക് പഞ്ചായത്തിനു വിട്ടുകൊടുത്ത സ്ഥലത്താണു ലക്ഷങ്ങള്‍ മുടക്കി ടാങ്ക് പണിതത്. പദ്ധതി ബ്ലോക്ക് പഞ്ചായത്ത് പിന്നീട് ഗ്രാമ പഞ്ചായത്തിനു കൈമാറുകയായിരുന്നു. ഈ ടാങ്കിനു ചുറ്റുമുള്ള സ്ഥലം വാങ്ങിയ ക്വാറി കമ്പനി, ഖനനം തുടങ്ങാന്‍ ടാങ്ക് തടസമാകുമെന്നുകണ്ടാണ് ടാങ്കും പൈപ്പുകളും നശിപ്പിച്ചത്. ടാങ്ക് പൊളിച്ചതിനെതിരേ കോട്ടൂര്‍ പഞ്ചായത്ത് പ്രസിഡന്റ് ബാലുശ്ശേരി പൊലിസില്‍ പരാതി നല്‍കിയിരുന്നെങ്കിലും പൊലിസ് കേസെടുത്തില്ല.
സുരേഷ് ചീനിക്കല്‍, ദിലീഷ് കൂട്ടാലിട, ബിജു കൊളക്കണ്ടി, ജിമിനേഷ് കൂട്ടാലിട, വി.കെ ജോബി, മനു പ്രസാദ് കൂട്ടാലിട, രഖില്‍ ചെടിക്കുളം, സുധി കിഴക്കയില്‍ എന്നിവരുടെ നേതൃത്വത്തിലാണു പരാതികള്‍ നല്‍കിയത്.