കശ്മിരിലെ നിലവിലെ സ്ഥിതിഗതികള്‍ കണക്കിലെടുത്താണ് തന്നെ പോകാന്‍ അനുവദിക്കാത്തതെന്ന് വിമാനത്താവളത്തിലെ ഉദ്യോഗസ്ഥന്‍ സൂചിപ്പിച്ചെന്ന് ഗിലാനി ഇന്ത്യന്‍ എക്‌സ്പ്രസിനോട് പറഞ്ഞു
ന്യൂഡല്‍ഹി: കശ്മീരി മാധ്യമപ്രവര്‍ത്തകനും എഴുത്തുകാരനുമായ ജൗഹര്‍ ഗിലാനിയെ ജര്‍മനിയിലേക്കുള്ള യാത്രയില്‍നിന്ന് തടഞ്ഞു. ശനിയാഴ്ച ന്യൂഡല്‍ഹി ഇന്ദിരാഗാന്ധി രാജ്യാന്തര വിമാനത്താവളത്തിലെത്തിയ അദ്ദേഹത്തെ തടഞ്ഞ ശേഷം ഇന്റലിജന്റ്‌സ് ബ്യൂറോ കസ്റ്റഡിയിലെടുത്തു. ജര്‍മനിയില്‍ പോകാനായി വിമാനത്താവളത്തിലെത്തിയ തന്നെ അധികൃതര്‍ തടയുകയായിരുന്നുവെന്ന് ഗിലാനി ആരോപിച്ചു.
ജര്‍മന്‍ പബ്ലിക് ബ്രോഡ്കാസ്റ്ററായ ഡച്ച് വെല്ലെ സംഘടിപ്പിക്കുന്ന ഇന്നലെ തുടങ്ങി ഒരാഴ്ച നീണ്ടുനില്‍ക്കുന്ന പരിപാടിയില്‍ പങ്കെടുക്കാനായാണ് ഗിലാനി ജര്‍മനിയിലേക്ക് തിരിച്ചത്. അദ്ദേഹം ഇതിനു മുന്‍പും ഡച്ച് വെല്ലെയുടെ പരിപാടികളില്‍ പങ്കെടുത്തിട്ടുണ്ട്. ഡച്ച് വെല്ലെയുമായി ചേര്‍ന്നു പ്രവര്‍ത്തിക്കുന്ന മാധ്യമപ്രവര്‍ത്തകനാണ് ഗിലാനി.
ചെക്ക് ഇന്‍ കഴിഞ്ഞ ശേഷം അഭിഷേക് എന്ന ഒരു ഉദ്യോഗസ്ഥന്‍ തന്നെ വിളിച്ച് യാത്ര റദ്ദാക്കാന്‍ ആവശ്യപ്പെടുകയായിരുന്നുവെന്ന് ഗിലാനി പറയുന്നു. ചെക്ക് ഇന്‍ കഴിഞ്ഞ ശേഷം എന്നെ ഒരു റൂമിലേക്ക് കൊണ്ടുപോയി. ഗിലാനിയെ രാജ്യം വിടാന്‍ അനുവദിക്കരുതെന്ന് തങ്ങള്‍ക്ക് നിര്‍ദേശം ലഭിച്ചതായി ആ ഉദ്യോഗസ്ഥന്‍ തന്നോട് പറഞ്ഞു. എന്തുകൊണ്ട് തന്നെ തടയുന്നു എന്നതില്‍ വിശദീകരണം വേണമെന്ന് ആവശ്യപ്പെട്ടെങ്കിലും വിശദീകരണങ്ങളൊന്നും എഴുതി നല്‍കാന്‍ സാധിക്കില്ലെന്നായിരുന്നു ഉദ്യോഗസ്ഥന്റെ പ്രതികരണം. കശ്മീരിലെ നിലവിലെ സ്ഥിതിഗതികള്‍ കണക്കിലെടുത്താണ് തന്നെ പോകാന്‍ അനുവദിക്കാത്തതെന്ന് വിമാനത്താവളത്തിലെ ഉദ്യോഗസ്ഥന്‍ സൂചിപ്പിച്ചെന്നും ഗിലാനി ഇന്ത്യന്‍ എക്‌സ്പ്രസിനോട് പറഞ്ഞു.
ഇന്റലിജന്‍സ് ബ്യൂറോയുടെ അഭ്യര്‍ത്ഥന പ്രകാരം ഗിലാനിയെ കസ്റ്റഡിയിലെടുത്തിരിക്കുകയാണെന്ന് വിമാനത്താവള അധികൃതര്‍ പറഞ്ഞു. രഹസ്യാന്വേഷണ ഏജന്‍സികള്‍ ചോദ്യം ചെയ്യുന്നതായാണ് റിപ്പോര്‍ട്ട്. സിവില്‍സര്‍വിസ് ഉപേക്ഷിച്ച് രാഷ്ട്രീയത്തില്‍ സജീവമായ ഷാ ഫസലിനെ അമേരിക്കന്‍ സന്ദര്‍ശനത്തില്‍ നിന്ന് കഴിഞ്ഞയാഴ്ച അധികൃതര്‍ തടഞ്ഞിരുന്നു.