തൃക്കുന്നപ്പുഴ : തൃക്കുന്നപ്പുഴ കടലില്‍ ലക്ഷങ്ങള്‍ പിതൃക്കളുടെ മോക്ഷത്തിനായി ബലിതര്‍പ്പണം നടത്തി.പിതൃക്കളെ സ്മരിക്കാനും അവരുടെ ആത്മശാന്തിക്കുവേണ്ടി പ്രാര്‍ഥിക്കാനും സംസ്ഥാനത്തിന്റെ വിവിധ ഭാഗങ്ങളില്‍ നിന്നും എത്തിയവരെക്കൊണ്ട് തിങ്കളാഴ്ച രാത്രി തന്നെ തൃക്കുന്നപ്പുഴ കടല്‍തീരം ജനസമുദ്രമായി മാറി.
 ചൊവ്വാഴ്ച പുലര്‍ച്ചെ നാലുമണിക്കാണ് ചടങ്ങുകള്‍ ആരംഭിച്ചത്. തൃക്കുന്നപ്പുഴ ശ്രീ ധര്‍മ ശാസ്താ ക്ഷേത്രത്തിന്റെ നേതൃത്വത്തിലാണ് ക്ഷേത്രത്തിലും കടല്‍തീരത്തും വിശ്വാസികള്‍ക്ക് ബലിതര്‍പ്പണത്തിനു് വേണ്ടിയുള്ള ഒരുക്കങ്ങള്‍ നടത്തിയത്. ഏകദേശം നാല് ലക്ഷത്തോളം പേര്‍ ഇക്കുറി ബലിതര്‍പ്പണത്തിനെത്തിയതായി സംഘാടകര്‍ പറഞ്ഞു.
50 പുരോഹിതന്മാരുടെ കാര്‍മികത്വത്തിലാണ്  ചടങ്ങുകള്‍ നടന്നത്. 50 ബലിപ്പുരകള്‍ ഇതിനായി തീരത്ത് കെട്ടിയുണ്ടാക്കിയിരുന്നു. ചൊവ്വാഴ്ച പുലര്‍ച്ചെ നാലുമണിക്ക് കര്‍മങ്ങള്‍ ആരംഭിച്ചു. വേദവൈദിക വിധിപ്രകാരം തൂശനിലയില്‍ എള്ളും പൂവും ചന്ദനവും ദര്‍ഭയും വെച്ച് പവിത്രം ധരിച്ച് പിതൃക്കളെ വിശ്വാസികള്‍ മനസ്സില്‍ ധ്യാനിച്ച് കര്‍മികള്‍ ഉരുവിട്ട് കൊടുക്കുന്ന മന്ത്രങ്ങള്‍ ഏറ്റുചൊല്ലി മൂന്നു തവണ പ്രദക്ഷിണം നടത്തിയതിനു ശേഷം ബലിപിണ്ടം ശിരസിലേറ്റി കടലില്‍ മുങ്ങുന്നു. ശേഷം സമീപത്തുള്ള  തൃക്കുന്നപ്പുഴ ധര്‍മ്മശാസ്താക്ഷേത്രത്തിലെത്തി ക്ഷേത്രക്കുളത്തില്‍ കുളിച്ച് ശുദ്ധിവരുത്തി ക്ഷേത്രദര്‍ശനം നടത്തി പിതൃപൂജയും തിലഹവനവും വഴിപാടുകള്‍ കഴിക്കുന്നതോടെ തര്‍പ്പണ ചടങ്ങുകള്‍ പൂര്‍ത്തിയാകും.
 പോലീസ്, എക്‌സൈസ്, ആരോഗ്യം, ഫയര്‍ ഫോഴ്‌സ്, റവന്യു എന്നീ വകുപ്പുകളുടെ സേവനവും ഏര്‍പ്പെടുത്തിയിരുന്നു. കോസ്റ്റ് ഗാര്‍ഡ് കടലില്‍ താവളമുറപ്പിച്ചിരുന്നു. ഇന്നലെ വൈകുന്നേരം വരെയും കടല്‍ത്തീരത്ത് ബലി പൂജകള്‍ നടന്നു. ശക്തമായ സുരക്ഷാ ക്രമീകരണങ്ങള്‍ ഉണ്ടായിരുന്നതിനാല്‍ ബലിതര്‍പ്പണചടങ്ങുകള്‍ സുഗമമായി നടന്നു.
 പന്തളം ,മാവേലിക്കര, കായംകുളം ,ആലപ്പുഴ എന്നിവിടങ്ങളില്‍ നിന്ന് കെ.എസ്.ആര്‍.ടി.സി യുടെ പ്രത്യേക സര്‍വ്വീസുകള്‍ ക്ഷേത്രത്തിലേക്കുണ്ടായിരുന്നു.ഭക്തജന തിരക്ക് അനിയന്ത്രിതമായതോടെ വെളുപ്പിനെ അഞ്ച് മണി മുതല്‍ പോലീസ് റോഡില്‍ വണ്‍വേ സംവിധാനം ഏര്‍പ്പെടുത്തി. അതിനാല്‍ കിഴക്ക് ഭാഗത്ത് നിന്ന് വന്ന വാഹനങ്ങള്‍ തൃക്കുന്നപ്പുഴയില്‍നിന്ന് വടക്കോട്ട് പോയി തോട്ടപ്പള്ളി വഴിയാണ് തിരികെ പോയിരുന്നത്.
മാവേലിക്കര:പിതൃസ്മരണയില്‍ ആയിരങ്ങള്‍ ബലിതര്‍പ്പണം നടത്തി.
കണ്ടിയൂര്‍ ആറാട്ടുകടവില്‍ ദേവസ്വം ബോര്‍ഡിന്റെയും നഗരസഭയുടെയും വിവിധ സര്‍ക്കാര്‍ വകുപ്പുകളുടേയും നേതൃത്വത്തില്‍ നടന്ന ബലിതര്‍പ്പണത്തില്‍ ആയിരങ്ങള്‍ പങ്കെടുത്തു, പുലര്‍ച്ചെ 3 മുതല്‍ ആരംഭിച്ച ബലിതര്‍പ്പണം 10 മണിയോടെ അവസാനിച്ചു.. ആരോഗ്യ വകു്പിന്റെ ഭാഗമായി ഒരു ഡോക്ടര്‍ അടങ്ങുന്ന സംഘത്തിന്റെ സേവനവും ഫയര്‍ഫോഴ്‌സിന്റെ ഒരു യൂണിറ്റിന്റെ സേവനവും സ്ഥലത്ത് ലഭ്യമായിരുന്നു. നഗരസഭയുടെ സഹായ കൗണ്ടറും സ്ഥലത്തുണ്ടായിരുന്നു. വഴുവാടി കിരാതന്‍കാവിലും, മറ്റം നരസിംഹസ്വാമി ക്ഷേത്രത്തിലും, വിശ്വബ്രഹ്മ വിദ്യാപീഠത്തിന്റെ നേതൃത്വത്തില്‍ പ്രായിക്കരയിലും ബലിതര്‍പ്പണ ചടങ്ങുകള്‍ നടന്നു.
  ചെങ്ങന്നൂര്‍:ചെങ്ങന്നൂര്‍ മിത്രക്കടവില്‍ മഹാദേവ ക്ഷേത്ര ഉപദേശക സമിതിയുടെ നേതൃത്വത്തിലാണ് ക്രമീകരണങ്ങള്‍ നടത്തിയത്. ഇവിടെ പുലര്‍ച്ചെ നലുമുതല്‍ ബലിതര്‍പ്പണങ്ങള്‍ ആരംഭിച്ചു. മിത്രമഠം കടവ്, വളഞ്ഞവട്ടം കീച്ചേരിക്കടവ്, മുണ്ടന്‍കാവ് ആറാട്ടുകടവ്, ഇടനാട് പള്ളിയോടക്കടവ് എന്നിവിടങ്ങളില്‍ ബലിതര്‍പ്പണങ്ങള്‍ നടന്നു.