മുക്കം: തെരുവ് നായയുടെ ആക്രമണത്തില്‍ സ്‌കൂള്‍ വിദ്യാര്‍ഥിക്ക് പരുക്കേറ്റു. ആനയാംകുന്ന് ഹയര്‍ സെക്കന്‍ഡറി സ്‌കൂളിലെ എട്ടാം ക്ലാസ് വിദ്യാര്‍ഥിയായ ഗസലിനാണ് നായയുടെ കടിയേറ്റത്. ഇന്നലെ രാവിലെ ഒന്‍പതോടെ സ്‌കുളിലേക്കുള്ള വഴിയില്‍ ആനയാംകുന്ന് ക്ഷേത്ര റോഡിന് സമീപത്ത് വെച്ചാണ് സംഭവം. ഗുരുതരമായി പരുക്കേറ്റ വിദ്യാര്‍ഥിയെ മുക്കം കമ്മ്യൂനിറ്റി ഹെല്‍ത്ത് സെന്ററിലും തുടര്‍ന്ന് കോഴിക്കോട് മെഡിക്കല്‍ കോളജ് ആശുപത്രിയിലും പ്രവേശിപ്പിക്കുകയായിരുന്നു. കൈകള്‍ക്കും കാലിനും ഉള്‍പ്പെടെ ശരീരത്തിന്റെ വിവിധ ഭാഗങ്ങളില്‍ നായയുടെ കടിയേറ്റിട്ടുണ്ട്.
മലയോര മേഖലയില്‍ തെരുവ് നായ ശല്യം രൂക്ഷമായിട്ടും നടപടി സ്വീകരിക്കാത്തതിനെതിരേ പ്രതിഷേധം ശക്തമായിട്ടുണ്ട്. മുക്കം അങ്ങാടിയിലും പരിസര പ്രദേശങ്ങളിലും രാത്രിയെന്നോ പകലെന്നോ വ്യത്യാസമില്ലാതെ തെരുവ് നായ്ക്കളുടെ വിളയാട്ടമാണെന്ന് നാട്ടുകാര്‍ പറയുന്നു.