അമ്പലപ്പുഴ: നിയന്ത്രണംതെറ്റിയ വാന്‍ വീടിന്റെ മതില്‍ ഇടിച്ചുതകര്‍ത്തു തലകീഴായി മറിഞ്ഞ് ഏഴു പേര്‍ക്ക് പരിക്കേറ്റു. ദേശീയപാതയില്‍ അയ്യന്‍ കോയിക്കല്‍ ക്ഷേത്രത്തിന് തെക്കുഭാഗത്തായി ഇന്നലെ ഉച്ചക്ക് ഒന്നരയോടെയായിരുന്നു അപകടം. തെക്കുഭാഗത്തേക്ക് പോയ വാന്‍ നിയന്ത്രണംതെറ്റി സമീപത്തെ മഠത്തില്‍ വീട്ടില്‍ നൂര്‍ഷായുടെ വീടിന്റെ മതില്‍ തകര്‍ത്ത് തലകീഴായി മറിയുകയായിരുന്നു. വീടിന്റെ സിറ്റൗട്ടും ജനലുകളും തകര്‍ന്നു. ഡ്രൈവര്‍ പഴയങ്ങാടി നെല്‍പ്പുരയ്ക്കല്‍ മുഹമ്മദ് കുഞ്ഞിന്റെ മകന്‍ ഹാഫിസി (19) ന്റെ കൈക്ക് ഒടിവ് സംഭവിച്ചു. നിസല്‍ ഖാന്‍, അഭിഷേക്, ആസിഫ്, നൈഫ്, ജുനൈദ്, നാദിര്‍ഷ എന്നിവരെയും ആലപ്പുഴ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.